Kwamamaza

Ubunyamabanga bwa EAC bwasabwe guhagarika isesagurwa ry’umutungo

Yanditswe kuya 4-09-2016 saa 08:53' na Rabbi Malo Umucunguzi


Inteko Ishinga amategeko y’Umuryango wa Afurika y’u Burasirazuba, EALA, yasabye ko Ubunyamabanga bwa EAC bwita ku bibazo birimo gusesagura umutungo, imitangire mibi y’amasoko n’itangwa ry’amasezerano y’gihe kigufi, ibintu binyuranye n’amategeko n’amabwiriza uyu muryango ugenderaho.

Kuwa Gatatu w’Iki Cyumweru nibwo EALA yaganiriye kuri raporo y’uko umutungo w’Ubunyamabanga bwa EAC wakoreshejwe, kugeza kuwa 30 Kamena 2015.

Depite Jeremie Ngendakumana ukomoka i Burundi ari na we ukuriye komisiyo ishinzwe ikoreshwa ry’umutungo w’Umuryango, ni we wagejeje kuri bagenzi be iyi raporo ya paji 76, agaragaza ko imikoreshereze y’umutungo idahagaze nabi nubwo hari ibikeneye gukosorwa.

Ati “Umutungo w’uyu muryango ugomba gukoreshwa mu bwitonzi no kureba igikenewe. Igenzura ry’imari ryerekanye ko hari aho Ubunyamabanga bwa EAC bwagiye bukoresha amafaranga kandi bitari ngombwa.”

“Agera ku $76,180 yakoreshejwe ku ngendo z’abakozi, ibikoresho bikenerwa mu nama, amavuta y’imodoka n’aho kwakirira inama hatandukanye. Inama zagiye zibera muri Ngurdoto na Marangu kandi nta bisobanuro bifatika bihari.’’

Iyi komisiyo yasabye ko Inama y’Abaminisitiri ba EAC bafasha Ubunyamabanga bw’Uyu muryango n’izindi nzego zishamikiyeho kugabanya isesagurwa ry’umutungo.

Mu kugenzura kandi iyi raporo yagaragaje ko Ubunyamabanga bwa EAC bwatanze isoko rya serivisi za Hotel rifite agaciro ka $163,763 nta bisobanuro bifatika bihari, bitandukanye n’amategeko agenga imitangire y’amasoko EAC igenderaho.

Abadepite bahurije ku kuba ahanini mu nzego za EAC hari ikibazo cy’imikoreshereze y’ingengo y’imari ku buryo hakenewe igenamigambi rinoze.

Uyu muryango wari ufite ingengo y’imari ingana na $125,643,894 ayakoreshejwe mu gihe cyakorewe igenzura akaba yari $81,349,607; angana na 65%.

Ngendakumana yakomeje agira ati “Ibidasobanutse byanagaragaye mu guha akazi abakozi no gutanga amasezerano y’igihe gito, binyuranye n’amabwiriza agenga abakozi b’uyu muryango n’amasezerano awushyiraho. Hari n’imitangire y’amasoko inyuranye cyane n’uburyo busanzwe.’’

Umunyamabanga Mukuru wa EAC, Amb. Liberat Mfumukeko yijeje abadepite ko impinduka ari gushyira mu Bunyamabanga zizatanga umusaruro, zigamije gukumira ikoreshwa nabi ry’ingengo y’imari, impinduka mu micungire y’umutungo no kugabanya amafaranga atangwa ku ngendo.

Ati “Kubw’aya mavugurura yose, Ubunyamabanga buzazigama nibura miliyoni $6. Mu mezi make ari imbere tuzakora isuzuma turebe niba turi kugera ku ntego zacu”

Mfumukeko yahawe kugeza muri Ukwakira ngo abe yagaragaje gahunda azifashisha mu gushyira mu bikorwa imyanzuro yahawe n’iyi nteko ishinga amategeko kimwe n’indi myanzuro yabanje.

Mu myanzuro yahawe harimo no guha ibihano abakozi b’Ubunyamabanga bwa EAC batandukira ku mabwiriza umuryango ugenderaho mu birebana n’Umutungo, ndetse hagasuzumwa itangwa ry’amasoko hagendewe ku mabwiriza yashyizweho mu 2012.

Iyi raporo yanagaragaje ko hakenewe ko ubuyobozi bwa EAC buganira n’ibihugu bigize uu muryango byakira ibikorwa byawo birimo nk’inama ngo bikurirweho umusoro ku nyongeragaciro, VAT, kuko kugeza uyu munsi wishyuzwa $847,183 by’uwo musoro.

Abadepite mu isesengurwa rya Raporo ku ikoreshwa ry'umutungo w'Umuryango wa Afurika y'Uburasirazuba
Depite Jeremie Ngendakumana ageza raporo kuri bagenzi be muri Eala

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 17 Ugushyingo 2016
Copyright © 2009 -2014 - IGIHE Ltd - All Rights Reserved