00:00:00 IGIHE NETWORK KN KINYARWANDA EN ENGLISH FR FRANCAIS

Ubujura no gukoresha nabi umutungo mu byatumye iruka rya Nyiragongo ritungurana

Yanditswe na Iradukunda Serge
Kuya 23 Gicurasi 2021 saa 05:26
Yasuwe :
0 0

Kwiba ibyuma byifashishwa mu gupima uko ikirunga cya Nyiragongo gihagaze no gukoresha nabi umutungo biri gushyirwa mu majwi mu byatumye iki kirunga kiruka gisa n’igitunguranye kuko nta makuru yaherukaga kugitangazwaho.

Ikirunga cya Nyiragongo giherereye mu Burasirazuba bwa Repubulika Iharanira Demokarasi ya Congo cyarutse mu gihe hari hashize amezi umunani bitangajwe ko gishobora kuruka hagati y’imyaka ine n’irindwi iri imbere, gusa ibi ntibyabujije kuba cyatunguye ababarirwa muri miliyoni ebyiri batuye mu Mujyi wa Goma no mu nkengero zacyo.

Umunsi ku munsi ikigo cyo muri Repubulika Iharanira Demokarasi ya Congo cyitwa ‘Goma Volcano Observatory’ nicyo gisanzwe gifite inshingano zo gukurikirana iki kirunga cya Nyiragongo maze kikamenyesha abaturage igihe hari impinduka bakibonyeho zishobora kubashyira mu kaga.

Muri Nzeri 2020 nibwo iki kigo cyari cyatangaje ko Nyiragongo ishobora kongera kuruka bitarenze 2027. Kuva iki gihe amakuru yerekeranye n’iki kirunga yabaye nk’ahagaritswe gutangwa kugeza mu ijoro ryo ku wa Gatandatu ubwo cyarukaga gitunguranye maze bigahindisha umushyitsi abatuye Goma.

Kuba amakuru y’iki kirunga ataherukaga kujya hanze byaturutse ahanini ku mikorere mibi irimo na ruswa yaranze ‘Goma Volcano Observatory’ bigatuma Banki y’Isi ihagarika inkunga yayigeneraga.

Mu 2020 nibwo Banki y’Isi yatangaje ko itazavugurura amasezerano y’inkunga yari ifitanye na Goma Volcano Observatory ahanini biturutse ku bibazo bya ruswa n’inyerezwa ry’umutungo. Buri mwaka Banki y’Isi yahaga iki kigo miliyoni 2$.

Mu itangazo Banki y’Isi yashyize hanze iki gihe yagize iti “Goma Volcano Observatory yabuze ubunararibonye ndetse haragaragara imbaraga nke mu bijyanye n’ikoreshwa ry’iyi nkunga.” Banki y’Isi yakomeje ivuga ko idashobora gukomeza gutanga amafaranga akoreshwa nabi.

Kuva Banki y’Isi yahagarika gutanga aya mafaranga imikorera ya Goma Volcano Observatory yatangiye kuzamba, amafaranga yo kwishyura abakozi nayo kugura lisansi ikoreshwa igihe bagiye gusura ahantu runaka atangira kubura.

Umukozi wa Goma Volcano Observatory, Honore Ciraba yabwiye Ibiro Ntaramakuru by’Abongereza, Reuters ko kuva Banki y’Isi yahagarika aya mafaranga byabasubije hasi ku buryo batakibasha no gufata ibipimo by’ibanze ku kirunga.

Yavuze ko kugeza ubu batabasha no kubona ubushobozi bwo kugura internet ifasha gukoresha ibyuma baba barashyize kuri iki kirunga ndetse n’ayo kugura lisansi ifasha abashakashatsi kugera aho bakorera.

Ciraba yavuze ko kutabasha gukora ubushakashatsi bishyira ubuzima bw’abaturiye Nyiragongo mu kaga. Ati “Niba tudakora amagenzura ahoraho ndetse ngo tube twatanga umuburo mbere y’igihe gito, abaturage ntihazaboneka umwanya wo kwimura abaturage bitume bapfa.”

Ubujura bwabaye inzitizi

Umushakashatsi mu bijyanye n’ibirunga, Dr Dyrckx Dushime yabwiye IGIHE ko koko iki kibazo cyo kubura amikoro kiri mu byatumye iki kirunga kiruka bisa n’ibitungurany. Yongeyeho ko indi ntandaro ari ibikorwa byo kwiba ibyuma byakoreshwaga mu gupima Nyiragongo.

Ati “Ubundi muri Congo bari bafite uburyo batangamo amakuru, bakayageza ku nzego z’ubuyobozi ariko nanone hari ibyuma bipima ubushyuhe biri mu misate ya kiriya kirunga, bipima uko umuriro ugenda wiyongera narabibonye kuko nagiye njya kugisura inshuro nyinshi.”

“Ariko imbogamizi ihari ikomeye ni uko ibikoresho bimwe na bimwe byagiye byibwa ugasanga nk’ibyuma bitanga umuriro hifashishijwe imirasire y’Izuba na camera ziri hejuru ku birunga zatangaga amakuru afasha gukurikirana ubuzima bw’ikirunga buri munsi biribwe, bityo amakuru ntabashe kuboneka. Ibyo byose ni zimwe mu mbogamizi zikomeye hakiyongeraho n’amikoro ari nayo mpamvu iki kirunga cyatunguranye cyane kubera ko ubushakashatsi butari bugikorwa neza.”

Uburangare mu bijyanye no gukurikirana Nyiragongo bwagaragaye kandi mu ijoro iki kirunga cyarukiyeho aho inzego z’ubuyobozi muri Congo zitabashaga kwemeza mu buryo budashidikanywaho ikirunga kiri kuruka aho bamwe bavugaga ko ari Nyiragongo abandi bakavuga ko ari Nyamulagira.

Ntabwo ari byinshi bizwi neza kuri Nyiragongo nk’igihe yatangiriye kuruka, ariko ababikurikiranira hafi bavuga ko kuva mu 1882 imaze kuruka inshuro 34.

Iruka rikomeye rya Nyiragongo ryatangiye ku wa 17 Mutarama 2002, nyuma y’iminsi yari ishize imitingito yarabaye myinshi mu bice byegereye ikirunga, kugeza ubwo iki kirunga cyaje kwiyasa maze gisuka ibikoma mu masaha menshi hagati ya metero 2,800 na 1,550, bigera mu mujyi wa Goma uri hafi aho, ku nkengero z’ikiyaga cya Kivu.

Abaturage bari baburiwe ndetse abagera ku 4000 bari bamaze kuvanwa muri aka gace kimwe no mu mujyi wa Gisenyi, mu gihe cy’iruka ry’icyo kirunga.

Abantu bagera kuri 245 bahasize ubuzima kubera kubura umwuka bitewe na gaz yoherezwaga n’ikirunga, ndetse inzu zimwe zirahirima kubera amazuku n’imitingito.

Bibarwa ko hafi 15% by’umujyi wa Goma byangijwe n’icyo gikorwa, ku buryo abantu 120 000 basigaye badafite aho kwikinga.

Iruka ryo kuri uyu wa Gatandatu ntabwo haratangazwa niba hari ubuzima bw’umuntu bwahatikiriye, icyakora hari bimwe mu bindi nk’imirima, ibikorwa remezo nk’imihanda n’inzu zangiritse biturutse ku mitingito.

Goma Volcano Observatory imaze igihe kinini itabasha gukurikirana Nyiragongo biturutse ku nkunga Banki y'Isi yahagaritse
Nyiragongo yaraye irutse itunguranye
Kuri Nyiragongo hari ibikoresho byatumaga abashakashatsi bamenya umunsi ku munsi amakuru y'icyo kirunga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .