U Rwanda rwungutse abapolisi bato hafi 900 (Amafoto)

Yanditswe na Mathias Hitimana
Kuya 6 Nyakanga 2018 saa 12:52
Yasuwe :
0 0

Polisi y’u Rwanda yungutse abapolisi bato 892 basoje amahugurwa mu Ishuri rya Polisi rya Gishari, kuri uyu wa Gatanu tariki 6 Nyakanga 2018.

Abo bapolisi basoje icyiciro cya 14 cy’amahugurwa y’abapolisi bato, bigishijwe mu gihe cy’amezi icyenda. Abapolisi bato 892 basoje amahugurwa barimo 160 b’abagore.

Minisitiri w’Ubutabera akaba n’Intumwa Nkuru ya Leta, Johnston Busingye yasoje aya mahugurwa y’abapolisi bato ari kumwe n’Umuyobozi mukuru wa Polisi, IGP Emmanuel Gasana.

Abo bapolisi bato bahawe amasomo azabafasha gutunganya imirimo bazashingwa mu kazi kabo arimo inshingano za polis , gukoresha intwaro, kubungabunga umutekano mu gihugu no mu mahanga, ibikorwa bya polisi, ikoranabuhanga mu iperereza, amategeko, amasomo abatoza imyitwarire, ubufatanye hagati ya bo n’abaturage, ubutabazi bw’ibanze, imyitozo ngororamubiri n’ibindi.

Mu mpanuro yahaye abinjiye muri Polisi y’u Rwanda, Minisitiri Busingye yagize ati “Ubumenyi n’ubushobozi mwahawe hano mugende mubishyire mu bikorwa, murangwa n’ubunyamwuga no gufata neza abo mushinzwe kurinda.”

Yabasabye guhora iteka bibuka ko ari abagaragu b’Itegeko, ati "Ntimuri hejuru y’amategeko, muri munsi yayo ni yo abagenga."

Yavuze ko ayo mahugurwa agaragaza kandi agashimangira ubushake bwa Leta y’u Rwanda bwo kubaka igipolisi cy’umwuga hagamijwe kugeza ku banyarwanda n’abaturarwanda umutekano usesuye.

Raporo ya Gallup 2018 yagaragaje ko u Rwanda ruza ku mwanya wa kabiri mu bihugu bifite abaturage batekanye muri Afurika.

Umuyobozi w’Ishuri rya Polisi rya Gishari, CP Vianney Nshimiyimana, yashimiye abapolisi basoje amahugurwa ku murava bagaragaje mu kwiga, abasaba kuzarangwa n’umuco wo gukunda igihugu, ubwitange n’ubunyangamugayo cyane cyane bakirinda ruswa n’izindi ngeso mbi zabatesha agaciro zikanangiza isura ya Polisi y’igihugu.

Abapolisi bato 892 basoje amahugurwa
Abayobozi bakuru ba Polisi bitabiriye isozwa ry'aya mahugurwa
Minisitiri Busingye Johnston agenzura amasibo y'akarasisi k'abapolisi basoje amahugurwa

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza