U Burundi bwafashe icyemezo cyo kuva mu rukiko rwa ICC

Yanditswe na Jean Pierre Tuyisenge
Kuya 7 Ukwakira 2016 saa 09:05
Yasuwe : XX
0

Leta y’u Burundi yatangaje ko igiye kwikura mu Rukiko Mpuzamahanga Mpanabyaha rw’i La Haye (ICC), nyuma y’amezi atandatu gusa umushinjacyaha mukuru warwo Fatou Bensouda atangaje ko bagiye gukora iperereza ku byaha by’intambara byakorewe muri iki gihugu.

Mu nama n’abaminisitiri yateranye ejo ku wa kane tariki ya 6 Ukwakira 2016, Visi-Perezida Gaston Sindimwo yatangaje ko bamaze kohereza ubusabe mu Nteko Ishinga Amategeko ngo bwigweho.

Yagize ati “Twamaze kohereza uyu mushinga mu Nteko ngo iwemeze, twasanze ari ngombwa ko tuvamo kugira ngo turusheho kwigenga."

Reuters dukesha iyi nkuru, ivuga ko muri iyi nama, mu mirongo migari yagombaga kuganirwaho harimo isubirwamo ry’Umushinga w’Itegeko rigenga amasezerano ya Rome yinjiza igihugu mu rukiko Mpuzamahanga Mpanabyaha rw’i la Haye mu Buholandi, u Burundi bwasinye mu mwaka wa 2003.

Muri Mata 2016, Umushinjacyaha Mukuru w’urwo rukiko yatangaje ko hagiye gukorwa iperereza ku byaha byakozwe mu mvururu zabaye muri icyo gihugu kuva mu mwaka wa 2015, byanatumye abasaga 450 bahasiga ubuzima abandi babarirwa mu bihumbi 300 bagata ingo zabo nkuko byatangajwe mu Cyegeranyo cy’Umuryango w’Abibumbye.

Ibi bibaye mu gihe mu nama y’Umuryango w’Ubumwe bwa Afurika (AU) yateraniye i Addis Ababa muri Ethiopia ku wa 18 Nyakanga 2016, Umuyobozi wawo Perezida Idriss Déby yanenze ko urwo rukiko rwibanda gusa ku bayobozi bo ku mugabane w’Afurika.

U Burundi bwinjiye mu bibazo bya Politiki kuva mu mwaka wa 2015, ubwo Perezida Nkurunziza yatangazaga ko aziyamamariza kuyobora manda ya gatatu yaje no gutorerwa.

Abatavuga rumwe na we bavuga ko icyo cyemezo giciye ukubiri n’ibiteganywa n’Itegeko Nshinga, n’amasezerano y’Arusha yo guhagarika intambara.

Ku wa Kabiri tariki ya 4 Ukwakira 2016, U Burundi bwateye utwatsi icyemezo cya Loni cyo kohereza komisiyo iza gukora iperereza ku bwicanyi n’iyicarubozo rihakorerwa, buvuga ko gikoze nabi ndetse ko gishingiye ku binyoma.

U Burundi bwafashe icyemezo cyo kuva mu rukiko rwa ICC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza