U Burundi burasaba EU kubukuriraho ibihano

Yanditswe na Jean Pierre Tuyisenge
Kuya 5 Ukwakira 2016 saa 09:35
Yasuwe :
0 0

Leta y’u Burundi yabonanye kuri uyu wa Mere n’abahagarariye Umuryango w’Ubumwe bw’Ibihugu by’i Burayi (EU) kugira ngo harebwe aho ingingo ya 96 y’amasezerano ya Cotonou ageze ashyirwa mu bikorwa, bunasaba gukurirwaho ibihano by’ubukungu bwashyiriweho.

Ingingo ya 96 y’amasezerano ya Cotonou ivuga uburyo ibihugu biri mu nzira y’amajyambere n’Umuryango w’Ubumwe bw’i Burayi bishobora gufatanya muri gahunda zitandukanye.

BBC dukesha iyi nkuru ivuga ko mu itangazo Minisitiri w’Ububanyi n’Amahanga Alain Aimé Nyamitwe yashyize ahagaragara, rivuga ko Leta yeretse abahagarariye EU ibyo yise ibinyoma biri mu cyegeranyo abahanga b’Umuryango w’Abibumbye baherutse gukora, cyagaragazaga uburyo uburenganzira bw’ikiremwamuntu bukomeje kubangamirwa mu Burundi.

Muri iryo tangazo, Minisitiri Alain Nyamitwe agira ati “ Ni icyegeranyo cyakozwe vuba na vuba, kandi u Burundi ntibwagishijwe inama”.

Umuvugizi wa Guverinoma Philippe Nzobonariba, nawe yabwiye Reuters ko icyo cyegeranyo “cyakozwe hagamijwe guhungabanya umudendezo w’u Burundi”.

Iyi nkuru ikomeza ivuga ko Leta yeretse abahagarariye Umuryango wa EU ko uburenganzira bw’ikiremwamuntu mu Burundi bumeze neza, kandi ko n’umutekano uhari.

Gusa ibyo aba batangaza bitandukanye n’ibyo Koen Vervaeke wari uhagarariye iryo tsinda yatangaje, kuko kuri we ngo hari ibyo abona bitaratungana birimo iby’uburenganzira bw’ikiremwamuntu n’ubwisanzure bw’itangazamakuru.

Barasaba gukurirwaho ibihano

Minisitiri Nyamitwe asaba uwo muryango gukuraho ibihano byerekeye ubukungu wafatiye igihugu cy’u Burundi.

Yagize ati “Nibyo haracyari utubazo tumwe na tumwe , ariko ibyo ntibikwiye gutuma u Burundi bufatirwa ibihano nkuko Umuryango wa EU ubisaba kubera ko byatuma ibintu biba bibi kurushaho."

Ku wa Mbere tariki 14 Werurwe 2016, EU yafashe icyemezo cyo guhagarika inkunga wateraga iki gihugu kuko ngo guverinoma yananiwe kugira icyo ikora ku guhutaza uburenganzira bwa muntu. Ni inkunga EU yagombaga kugenera u Burundi kuva mu 2014-2020 ibarirwa muri miliyoni 430 z’Amayero.

Tariki 2 Ukwakira 2015 kandi, Umuryango w’Ubumwe bw’Ibihugu by’i Burayi wafatiye ibihano Abarundi bane barimo Godefroid Bizimana, Umuyobozi Mukuru wungirije wa Polisi; Gen. Gervais Ndirakobuca bakunze kwita Ndakugarika; Mathias Joseph Niyonzima bakunze kwita Kazungu, hamwe na Gen Leonard Ngendakumana wahoze ari Umuyobozi muri Perezidansi y’u Burundi.

Ku wa 29 Nzeri 2016, Akanama k’Umuryango w’Ubumwe bw’i Burayi (EU), kemeje kugumishaho ibihano byafatiwe abo Barundi kubera uruhare rwabo mu mvururu za politiki zikomeje kuba muri icyo gihugu

Itsinda ry'abahagarariye EU

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza