Kwamamaza

U Bufaransa bwahatiye Congo gutegura bwangu amatora y’uzasimbura Kabila

Yanditswe kuya 20-09-2016 saa 08:19' na Philbert Hagengimana


U Bufaransa bwababajwe n’uko Komisiyo y’Amatora muri Repubulika Iharanira Demokarasi ya Congo (RDC) itabashije gutegura amatora y’Umukuru w’Igihugu ngo abere igihe giteganyijwe mu Itegeko Nshinga, buboneraho gusaba ko yakwihutishwa.

Mu itangazo ryashyizwe ahagaragara kuri uyu wa 19 Nzeri 2016, Minisiteri y’Ububanyi n’Amahanga y’u Bufaransa,Jean-Marc Ayrault, yahamagariye Leta ya Congo kwihutisha imyiteguro y’amatora.

Muri iryo tangazo, Leta y’u Bufaransa yavuze ko ari ngombwa ko ingengabihe y’amatora imenyekana vuba bishoboka. Yaboneyeho gusaba RDC kubahiriza uburenganzira bw’abaturage burimo ubwo kwigaragambya mu mutuzo.

Nk’uko Komisiyo y’Umuryango w’Ubumwe bw’u Burayi yabitangaje muri Gicurasi uyu mwaka, u Bufaransa na bwo busanga imigendekere myiza y’amatora muri RDC izaturuka ku bushake bwa buri wese urebwa na yo.

Icyo gihugu ntikirengagiza iterambere RDC yagezeho mu myaka ishize, ariko imvururu cyane cyane muri iki gihe hitegurwa amatora y’Umukuru w’Igihugu ni imbogamizi ikomeye ku buzima bw’icyo gihugu, ari na yo mpamvu u Bufaransa busaba ko buri ruhande rugira umuhate wo kubahiriza umwanzuro 2277 w’Akanama k’Umuryango w’Abibumbye gashinzwe amahoro ku Isi, hakabaho ibiganiro by’amahoro bigamije gushakira umuti urambye ibibazo by’icyo gihugu.

Imyigaragambyo irarimbanije

Mu gihe u Bufaransa buhamagararira Leta ya Congo kubahiriza uburenganzira bw’abigaragambya kandi hagategurwa amatora y’Umukuru w’Igihugu biciye mu mucyo, abaturage bazindukiye mu mihanda kuri uyu wa Mbere tariki ya 19 Nzeri, aho intero yari imwe bagira bati “Kabila dégage!", "Kabila doit partir!” tugenekereje mu Kinyarwanda ngo “Kabila vaho! Kabila agomba kugenda!”

TV5 dukesha iyi nkuru itangaza ko imyigaragambyo i Kinshasa yatangiriye ku cyanya cyiswe ‘boulevard Lumumba’, ahanabereye imvururu zikaze, ku buryo byabaye ngombwa ko Polisi yitabaza amasasu n’ibyuka biryana mu maso kugira ngo itatanye abigaragambyaga barimo bayitera amabuye, byatumye abantu 17 barimo abapolisi batatu bahasiga ubuzima.

Amashyaka atavuga rumwe n’ubutegetsi bivugwa ko ari yo yahamagariye abayoboke bayo kwigaragambya, kugira ngo bumvishe Perezida Kabila ko ahawe integuza, maze mu mezi atatu ari imbere akaba arekuye ubutegetsi.

Biteganyijwe ko manda ya Perezida Kabila izarangira ku wa 19 Ukuboza uyu mwaka. Kugeza ubu ntiharatangazwa igihe amatora azabera, uretse ko Urukiko rushinzwe kurengera Itegeko Nshinga rwamaze kwemeza ko bidashoboka ko amatora abera igihe yari ateganyijwe bitewe n’ibyangombwa ngo bitarajya ku murongo.

Ibyo byakurikiwe n’uko Perezida Kabila yasabye ibiganiro by’amahoro, ariko nyuma yo kutumvikana ku ngengabihe y’amatora, amwe mu mashyaka atavuga rumwe n’ubutegetsi ahita yivana muri ibyo biganiro mu cyumweru gishize.

Perezida Kabila uhatirwa kuva ku butegetsi, yabugiyeho mu 2001 asimbuye se Laurent Kabila wari umaze kwicwa, ariko hakurikijwe Itegeko Nshinga icyo gihugu kinderaho kuva muri 2006, Perezida Kabila amaze kuzuza manda ebyiri yemererwa naryo bityo bivuga ko atemerewe kongera kwiyamamaza mu matora ateganyijwe.

Jean-Marc Ayrault, Minisitiri w'ububanyi n'amahanga w'u Bufaransa asaba ko amatora muri Congo yihutishwa

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved