00:00:00 IGIHE NETWORK KN KINYARWANDA EN ENGLISH FR FRANCAIS

U Budage bwahaye EAC inkunga ya miliyoni 65 y’amadolari

Yanditswe na Muhonzire Sylvine
Kuya 19 Gicurasi 2021 saa 07:23
Yasuwe :
0 0

Ambasaderi w’u Budage muri Tanzania unashinzwe Umuryango w’Ibihugu bya Afurika y’Uburasizuba, EAC, Regine Hess, n’Umunyamabanga Mukuru wa EAC, Dr Peter Mathuki, basinyanye amasezerano y’inkunga ya miliyoni 65$ [arenga miliyari 65 Frw].

Iyi nkunga igamije gufasha ibihugu biri muri uyu muryango gushyira mu bikorwa imishinga inyuranye, aho 72,3% by’iyi inkunga bizakoreshwa mu mishinga ijyanye n’ubuzima mu gihe 27,7% azakoreshwa muri gahunda zijyanye n’ikoranabuhanga no gukwirakwiza amazi meza.

Miliyoni 17 $ zizashyirwa mu kigo cya EAC gishinzwe inkingo, no kugeza ubuzima buzira umuze kuri bose, (RCE-VIHSCM) giherereye muri Kaminuza y’u Rwanda.

Aho, aya mafaranga azafasha iki kigo kwagura ibikorwa no kuzamura isura yacyo binyuze mu gukoresha ikoranabuhanga mu bikorwa by’ubuzima cyane mu kugenzura ubuziranenge bw’imiti.

Mu rwego rw’ubuzima kandi hazashyirwa miliyoni 30$ zizifashishwa muri gahunda ya EAC yo kongerera ubudahangarwa abana, ku bufatanye n’ikigo cy’inkingo cya Gavi, aho aya mafaranga azakoreshwa mu kugura no gukwirakwiza inkingo z’ubwoko bune, zizahabwa abana bo mu bihugu bitandatu bigize Umuryango w’Ibihugu by’Afurika y’Uburasirazuba bityo indwara n’imfu bigabanuke.

Izindi Miliyoni 12$ zizashyirwa muri gahunda yo gutunganya no gusakaza amazi meza aturuka mu kiyaga cya Victoria, gahunda yatangijwe muri Gashyantare 2020.

Uburezi bushingiye ku guhanga udushya mu ikoranabuhanga nabwo buri mu bizashyirwamo amafaranga, aho icyiciro gishya cyo guteza imbere ikoranabuhanga no guhanga udushya muri Afurika y’Iburasirazuba, kizashyirwamo miliyoni 6$, kugira ngo hatangwe amahugurwa azafasha urubyiruko kugira ubu bumenyi, ku bufatanye na Kaminuza ihuriweho n’ibihugu biri muri EAC yitwa Inter-University Council for East Africa (IUCEA).

Mu ijambo rye, Ambasaderi Hess yavuze ko u Budage buzakomeza gufasha EAC.

Ati “Dusubije amaso inyuma mu myaka 20 ishize, twagiye tugirana imikoranire ya hafi n’ubunyamabanga bwa EAC. Kandi dufite intego yo gukomeza ubu bufatanye n’ubuyobozi bushya bwa Peter Mathuki, mu bijyanye n’ubuzima, ubucuruzi, ubukungu bushyingiye ku bikorwa remezo ndetse n’amashuri y’umunyengiro, TVET.”

Hess yakomeje avuga ko u Budage buzongerera inkunga uyu muryango, ingana miliyoni 6,6$ zo guhangana n’icyorezo cya Covid-19.

Peter Mathuki, yashimiye Ambasaderi Hess ku bufatanye Guverinoma y’u Budage yakomeje kugirana n’uyu muryango kuva washingwa mu 1999.

Ati “Mu myaka 22 ishije u Budage bwahaye inkunga EAC irenga miliyoni 631,29 $ yo gukoreshwa mu mishinga no muri porogaramu zitandukanye zigamije kuzamura uyu muryango cyane mu bukungu no mu bikorwa bigamije inyungu z’abaturage.”

“Amasezerano yasinywe uyu munsi hagati y’impande zombi ya miliyoni 65$ yerekana uruhare rw’u Budage mu bikorwa bigamije iterambere rya EAC. Nanjye nzakomeza gushimangira uyu mubano.”

Mu bari bitabiriye iki gikorwa cyo gushyira umukono kuri aya masezerano harimo Umuvugizi w’Inteko Ishinga Amategeko y’Umuryango w’Ibihugu bya Afurika y’Uburasirazuba, Martin Ngoga, Umunyamabanga wungirije wa EAC ushinzwe ibikorwaremezo, Steven Mlote, ndetse n’Umunyamabanga wa Kaminuza ihuriweho n’ibihugu bya EAC, Gaspard Banyankimbona.

U Budage bwahaye EAC inkunga ya miliyoni 65$ yo gufasha imishinga irimo iy'ubuzima, ikoranabuhanga no gukwirakwiza amazi meza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .