00:00:00 IGIHE NETWORK KN KINYARWANDA EN ENGLISH FR FRANCAIS

Tanzania yemeje amasezerano y’Isoko Rusange rya Afurika

Yanditswe na IGIHE
Kuya 10 Nzeri 2021 saa 08:21
Yasuwe :
0 0

Guverinoma ya Tanzania yemeje burundu amasezerano yo kwinjira mu Isoko Rusange rya Afurika (AfCFTA) rigamije koroshya ubucuruzi, urujya n’uruza rw’abantu n’ibintu hagati y’ibihugu bigize uwo mugabane.

Abinyujije kuri Twitter, Minisitiri w’Inganda n’Ubucuruzi, Kitila Mkumbo, yavuze ko mu buryo budasubirwaho Tanzania yamaze kwemeza amasezerano ya AfCFTA yinjira ku isoko ririho abakiliya basaga miliyari 1.2.

Nubwo John Pombe Magufuli wari Perezida wa Tanzania yari yarashyize umukono kuri aya masezerano, iki gihugu cyari kitarayemeza burundu cyane ko Inteko Ishinga Amategeko yari itarabifataho umwanzuro.

Muri Mutarama 2021 nibwo hatangiye ishyirwa mu bikorwa ry’amasezerano y’Isoko Rusange rya Afurika. Ni amasezerano yasinyiwe i Kigali muri Werurwe 2018, mu Nama Idasanzwe y’Umuryango wa Afurika Yunze Ubumwe, yemezwa muri Mata umwaka wakurikiyeho nyuma y’uko ibihugu 22 byari bikenewe bimaze kuyemeza burundu.

Amasezerano ashyiraho iri soko avuga ko ibicuruzwa 90% bizakurirwaho imisoro mu gihe biri gucuruzwa hagati y’Umugabane wa Afurika kandi byahakorewe, intego igomba kuzaba yagezweho nibura mu mwaka wa 2034.

Icyo gihe Afurika izaba ituwe na miliyari 1,8 z’abantu, bavuye kuri miliyari 1,3 bariho uyu munsi. Mu gihe rero Isoko rusange rya Afurika rizaba impamo, byitezwe ko rizazahura ubukungu bw’uyu mugabane ndetse rigatanga imirimo irenga miliyoni 100 hirya no hino.

Ibi byose bigamije kongera ubucuruzi ibihugu bya Afurika bikorana hagati yabyo cyane ko Ishami ry’Umuryango w’Abibumbye ryita ku Bucuruzi n’Iterambere (UNCTAD) rigaragaza ko hagati y’umwaka wa 2015 na 2017, ubucuruzi hagati y’ibihugu bya Afurika bwari ku kigero cya 16,6% gusa, nyamara ubwa Afurika n’u Burayi bukaba ku kigero cya 60% mu gihe buri ku kigero cya 50% hagati ya Afurika na Aziya.

Guverinoma ya Perezida Samia Suluhu yemeje amasezerano y’Isoko Rusanga rya Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .