00:00:00 IGIHE NETWORK KN KINYARWANDA EN ENGLISH FR FRANCAIS

Tanzania yavuye ku izima yemera gutangira gukingira COVID-19

Yanditswe na IGIHE
Kuya 30 Kamena 2021 saa 01:30
Yasuwe :
0 0

Perezida wa Tanzania, Samia Suluhu Hassan yavuze ko iki gihugu cyafashe umwanzuro wo gutangira gukingira abaturage bacyo COVID-19 nyuma y’igihe kinini cyari gishize cyarinangiye.

Tanzania ifashe umwanzuro wo gutangira gukingira COVID-19 nyuma y’igihe kinini cyari gishize yarinangiye.

Nyakwigendera Dr John Pombe Magufuli wayoboraga iki gihugu we yari yaravuze ko nta nkingo za COVID-19 igihugu cye gikeneye ngo kuko “Abanya-Tanzania atari imbeba zo kugeragerezaho urukingo.”

Iyi mvugo ya Magufuli yatumye Tanzania itangira kunengwa n’amahanga cyane ko yaje n’ubundi iki gihugu cyari kimaze iminsi gishinjwa kujenjeka mu bijyanye n’ingamba zo guhangana na COVID-19.

Mu kiganiro yagiranye n’abanyamakuru mu ntangiriro z’iki cyumweru, Perezida Samia Suluhu yavuze ko Guverinoma yicaye ifata umwanzuro wo gutangira gukingira COVID-19 ababishaka.

Yagize ati “Mu nama yacu ya Guverinoma iheruka, twafashe umwanzuro w’uko tuzakingira. Ariko abaturage ntabwo bazakingirwa ku ngufu, abazaba babishaka gusa nibo bazakingirwa.”

Perezida Samia yavuze ko uyu mwanzuro bawufashe nyuma yo kubona ko n’ubundi hari abaturage bikingiza hanze y’igihugu.

Aya magambo ya Perezida Samia Suluhu yakiriwe neza na Ambasaderi wa Leta Zunze Ubumwe za Amerika muri Tanzania, Donald Wright maze abinyujije kuri Twitter avuga ko igihugu cye cyiteguye gufasha Tanzania muri uru rugendo rwo gukingira.

Yagize ati “Ibyo Perezida Samia yatangaje ko Tanzania iri mu myiteguro yo gushaka inkingo zizahabwa ababyifuza ni intambwe ikomeye izafasha Tanzania n’Isi yose guhashya COVID-19, Amerika yiteguye gutanga umusanzu.”

Kuva Samia Suluhu yatangira kuyobora Tanzania yagaragaje impinduka mu bijyanye no kurwanya COVID-19, asaba abaturage kubahiriza ingamba zo kuyirinda zirimo no kwambara agapfukamunwa, ndetse vuba aha iki gihugu cyatangiye kongera gushyira hanze imibare igaragaza uko iki cyorezo gihagaze.

Tanzania yitegura gutangiza ibikorwa byo gukingira COVID-19 yatangiye kubahiriza zimwe mu ngamba zo kurwanya iki cyorezo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .