Kwamamaza

Tanzania yateye utwatsi amasezerano ya EPA u Rwanda ruheruka gushyiraho umukono

Yanditswe kuya 8-11-2016 saa 15:49' na Rabbi Malo Umucunguzi


Inteko Ishinga Amategeko ya Tanzania yanze ko iki gihugu gishyira umukono ku masezerano y’ubufatanye mu bucuruzi hagati y’Umuryango wa Afurika y’Iburasirazuba (EAC) n’Umuryango w’Ubumwe bw’u Burayi (EU).

Abadepite baturuka mu ishyaka riri ku butegetsi muri Tanzania CCM hamwe n’abo ku ruhande rw’abatavuga rumwe n’ubutegetsi, kuri uyu wa Kabiri bahurije ku kuba igihugu cyabo kitahita gisinya kuri aya masezerano azwi nka EPA (Economic Partnership Agreement).

Nk’uko Ikinyamakuru Daily News cyabitangaje, Perezida w’Inteko Ishinga Amategeko ya Tanzania, Job Ndugai, yavuze ko “hari indi myumvire bisaba kugira ngo ayo masezerano ashyigikirwe.’’

Amasezerano ya EPA afatwa nk’azoroshya ubucuruzi n’ubufatanye mu iterambere hagati ya EAC na EU, harimo no gukuraho imisoro ku bicuruzwa bikorerwa mu bihugu bigize iyo miryango yombi.

Umunyamabanga uhoraho muri Minisiteri y’Ububanyi n’Amahanga ya Tanzania, Dr. Aziz Mlima, muri Nyakanga yabwiye itangazamakuru ko igihugu cye kititeguye kuko ashobora kuzana ibihombo kuri EAC kurusha inyungu.

Ati “Impuguke zacu zasesenguye neza ko uburyo ayo masezerano yakozwemo, ko EPA itazungura inganda zacu muri Afurika y’u Burasirazuba. Ahubwo azatuma zisenyuka kuko ibihugu byateye imbere biziharira isoko ryacu.”

Amasezerano ya EPA yarangije kuganirwaho mu Ukwakira 2014 ariko kuyashyiraho umukono biragorana, nyuma y’uko u Bwongereza bwivanye muri EU, aho Uganda na Tanzania byasabaga ko yongera kuganirwaho kuko isoko ryaganiriweho mbere ryari rihindutse.

U Rwanda na Kenya bayasinye mu mezi abiri ashize mu muhango wabereye i Bruxelles mu Bubiligi, Uganda yari yaranze gusinya iza kwisubiraho, ariko Tanzania ikomeza kwima amaso ayo masezerano yamaze imyaka isaga itanu aganirwaho, aho ishimangira ko inyungu zishobora kuzayavamo zazarutwa n’igihombo kizavuka kuri ibi bihugu bifite inganda zikiri nto.

Kenya yo ikeneye cyane ko ayo masezerano ashyirwaho umukono kugira ngo ibashe kugeza ibicuruzwa byayo ku isoko ry’i Burayi itatswe imisoro, ariko Tanzania ishimangira ko nta nyungu EPA izazanira EAC ahubwo izaha isoko rigari ibihugu byo muri EU bifite inganda zateye imbere, ibicuruzwa byabo bikiharira amasoko yo mu karere.

Ku ruhande rw’u Rwanda, Minisitiri w’Ubucuruzi, Inganda n’Ibikorwa bya EAC, François Kanimba, aheruka kubwira The East African ko abanyepolitiki bakwiye gushyira imbere inyungu z’akarere muri rusange kurusha iz’igihugu ukwacyo, bagashyira umukono kuri ayo masezerano “y’ingirakamaro ku karere”.

Yagize ati “Ibibazo biri kugenda bigaragazwa kuri aya masezerano ya EPA ni ibibazo byatekerejweho mbere kandi ingamba zihagije zo kubyirinda zashyizwe mu masezerano ya nyuma mu rwego rwo kurengera inganda zacu zikiri nto.”

“Niba mu gihe kiri imbere hari impungenge ku bukungu bwacu, dushobora kongera tukabiganiraho. EPA ntabwo ari bibiliya. Twumvikanye ko nyuma ya buri myaka itanu tuzajya twongera tukaganira kandi tukagenzura uko amasezerano yashyizwe mu bikorwa. Niba hari igihugu gisanze kitarungukiye muri EPA, gishobora kuzamura icyo kibazo kikaganirwaho”.

Ibihugu byo muri EAC byohereza cyane muri EU, ikawa, indabo cyane cyane mu gihugu cya Kenya, itabi, icyayi, amafi n’imboga, mu gihe ibihugu byo muri EU byohereza muri EAC ibicuruzwa birimo imashini zo mu nganda n’ibyuma binyuranye, imodoka, imiti n’ibindi.

Birasaba ko ibihugu byose bya EAC bisinya kuri aya masezerano kugira ngo ashyirwe mu bikorwa nk’uko byemeranyije urujya n’uruza rw’abantu n’ibicuruzwa, cyane ko azaba ari isoko ry’akarere ahokuba igihugu ukwacyo.

Inteko Ishinga Amategeko ya Tanzania yateye utwatsi isinywa ry'aya masezerano

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved