Tanzania yanze agasuzuguro k’u Bushinwa mu mushinga wo kubaka icyambu cya Bagamoyo

Yanditswe na HABIMANA James
Kuya 23 Gicurasi 2019 saa 11:38
Yasuwe :
0 0

Igihugu cya Tanzania cyahagaritse umushinga wa miliyari 10 z’amadorali yagombaga gutangwa n’u Bushinwa ngo hubakwe icyambu cya Bagamoyo, nyuma yo gusanga harimo igisa nk’ubukoloni.

Iki cyambu kiramutse cyubatswe cyaba ari cyo cyambu kinini muri Afurika y’Uburasirazuba.

Mu 2013 Tanzania yasinyanye amasezerano n’ikigo Merchants Holdings International cyo mu Bushinwa cyubaka ibyambu, kugira ngo hubakwe icyambu cya Bagamoyo ndetse n’agace k’inganda, hagamijwe guhindura Tanzaniya igihugu gikomeye mu by’ubucuruzi muri aka karere.

Icyakora ubuyobozi muri Tanzania bwabwiye ibiro ntaramakuru by’Abongereza, Reuters ko u Bushinwa burimo kuzana amananiza muri uyu mushinga.

Deusdedit Kakoko, umuyobozi mukuru w’ikigo gishinzwe ibyambu muri Tanzaniya yagize ati “Amabwiriza baduhaye ntabwo yoroshye, twe rero twahisemo kubyanga, iyo bikorwa byagombaga kuba ari igihombo, Abashinwa ntibagomba kudufata nk’abana biga ngo bifate nk’abarimu bacu.”

Yakomeje agira ati “Amwe mu mabwiriza umushoramari yifuzaga kudushyiraho harimo ko yashakaga kuzajya asoresha ubwato bugeze ku cyambu, harimo gusoresha bimwe mu bicuruzwa bivanywe mu bwato no kuba bahabwa ingurane ku bikoresho byabo byagira ikibazo muri uyu mushinga".

Kakoko yavuze ko bamaze kwandikira iki kigo bakibwira ibyo batemera, bakaba bategereje ko bakongera kuganira mu gihe baba biteguye.

Ubuyobozi bw’iki kigo bwo bwavuze ko nyuma y’imyaka myinshi y’ibiganiro na Tanzaniya, byananiranye kuba bagira icyo bumvikanaho.

Bavuze ko uyu mushinga ari uw’ubucuruzi bityo ko bimwe mu bigomba gukurikizwa ari ubufatanye aho buri wese abigiriramo inyungu.

Kuva yajya ku buyobozi mu 2015, Perezida John Magufuri yagiye agirana amasezerano n’ibigo mpuzamahanga by’ishoramari byaba ibikora mu bucukuzi bw’amabuye y’agaciro, itumanaho, imishinga y’ibikorwa remezo n’indi.

Uyu mushinga wo kubaka icyambu cya Bagamoyo wasinywe mu 2013 ubwo Perezida w’u Bushinwa Xi Jinping yasuraga Tanzaniya ku butegetsi bwa Jakaya Kikwete.

Mu cyumweru gishize abagize Inteko Ishinga Amategeko ya Tanzaniya basabye leta gutanga ibisobanuro ku idindira ry’uyu mushinga.

Igishushanyo mbonera cy'icyambu gishya cya Bagamoyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza