00:00:00 IGIHE NETWORK KN KINYARWANDA EN ENGLISH FR FRANCAIS

Tanzania yagujije miliyoni zirenga 500 z’amadolari zo guhangana n’ingaruka za Covid-19

Yanditswe na Muhonzire Sylvine
Kuya 18 Kamena 2021 saa 01:17
Yasuwe :
0 0

Tanzania yagujije Ikigega Mpuzamahanga cy’Imari ku Isi (IMF), miliyoni 560 z’amadolari zo guhangana n’ingaruka icyorezo cya Covid-19 cyateje ku bukungu bw’iki gihugu, ibintu iyi banki yavuze ko bikeneye ibimenyetso bifatika kubera ko Tanzania imaze umwaka idatanga amakuru yerekeranye na Coronavirus.

Ministiri w’ubucuruzi muri iki gihugu, Mwigulu Nchemba, yavuze ko iyi nguzanyo Tanzania yayisabye kugira ngo ihangane n’ingaruka Covid-19 yateje ku bukungu no ku buzima bw’abaturage b’iki guhugu muri rusange.

Ministiri Nchemba yabwiye The Citizen ko amakuru arambuye kuri iyi nguzanyo azatangazwa nyuma. Yagize ati “Twasabye inguzanyo mu gihe cya nyacyo cyagenwe, ariko nzatanga amakuru arambuye mu gihe kiri imbere.”

Igihe ntarengwa cyo kwaka inguzanyo muri iki kigega cya IMF byari tariki 15 Kamena 2021.

Ubwo hamurikwaga ingengo y’imari y’umwaka wa 2021 na 2022 ya Tanzania ingana na miliyari 15,5$, Ministiri Nchemba yabwiye Inteko Ishinga Amategeko ko iyi nguzanyo Tanzania yasabye ya miliyoni 560$ ije kunganira iyi ngengo y’imari kandi nta mutwaro izashyira kuri iki gihugu kuko izaba ifite inyungu nke.

Uhagarariye IMF muri Tanzania, Jens Reinke, yabwiye Reuters ko IMF iri mu biganiro na Guverinoma ya Tanzania kugira ngo ihabwe iyi nguzanyo ariko mbere y’uko iyihabwa izabanza gutanga amakuru yose ya Covid-19, kuko iheruka kuyatanga muri Gicurasi 2020.

Yagize ati “Iyo usaba guhabwa inguzanyo zo guhangana n’ingaruka zatewe n’icyorezo ni ngombwa ko werekana ibimenyetso bifatika byemeza ko koko wagizweho ingaruka na Covid-19.”

Mu bigaragara ubutegetsi bwa Samia Suluhu buri gushakira ibisubizo mu murongo utandukanye n’uw’uwahoze ari Perezida w’iki gihugu witabye Imana, John Pombe Magufuli, kuko we yavugaga ko nta Coronavirus iri mu gihugu ndetse ko nta mpamvu yo gukurikiza ingamba izo ari zo zose zo kwirinda iki cyorezo.

Nyuma y’urupfu rwe, intero ntikiri ya yindi ahubwo bamwe batangiye kwambara udupfukamunwa, ahantu hahurira abantu benshi nko mu masoko hashyizwe amazi yo gukaraba n’umuti usukura intoki, ndetse hasigaye hakurikizwa ingamba zo kwirinda Covid-19.

Nubwo iki gihugu kitakurikije amabwiriza yo kwirinda iki cyorezo, ubukungu bwacyo bwiyongereyeho 4,8% mu mwaka wa 2020. Gusa nubwo bwazamutse ntibwageze ku ntego iki gihugu cyari cyihaye yo kuzamura ubukungu ku kigero cya 5,5% mu 2020.

Dr. Nchemba yabwiye Inteko Ishinga Amategeko ko Tanzania ifite intego yo kongera ubukungu ku kigero cya 5,6% mu mwaka wa 2021.

Ku ngoma ya Samia Suluhu, muri Tanzania hafashwe ingamba zo kwirinda Covid-19 /Ifoto: Quartz

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .