Tanzania: Perezida Magufuli yavuze ko Imana izabafasha gutsinda ibyorezo birimo na COVID-19

Yanditswe na Uwimana Abraham
Kuya 14 Gashyantare 2021 saa 02:25
Yasuwe :
0 0

Perezida wa Tanzania, Dr John Pombe Magufuli yatangaje ko Tanzania izatsinda ibyorezo byose harimo na COVID-19, binyuze mu kwita ku nama z’inzego z’ubuzima, gushyira Imana imbere, gukora cyane, kugumana imbaraga ndetse no kunga ubumwe.

Ibi Magufuli yabitangarije mu Mujyi wa Morogoro ubwo yari amaze gufungura ku mugaragaro isoko rya Kingalu ryuzuye ritwaye agera kuri miliyari 17,696 z’amashilingi (ahwanye na miliyari 7,48 Frw).

Perezida Magufuli yashimiye abaturage ba Morogoro n’igihugu cyose ku bwo gukomeza kwizera Imana, avuga ko ibyorezo byose bazabitsinda mu izina ry’Imana iri hejuru ya byose.

Yagize ati “Imana ni byose, twaratsinze mu ntangiriro kandi tuzakomeza dutsinde n’ahazaza. Tuzakomeza dutsinde kubera ko Imana yamye iri kumwe n’Abanya-Tanzania.”

“Ubwoba nicyo cyaha kibi cya mbere mu guhangana n’icyorezo. Bityo rero ndakangurira abaturage ba Morogoro ndetse n’Abanya-Tanzania muri rusange guhagarara bagashikama. Ibi tuzatsinda ibintu byose bisubire mu buryo.”

Dr Magufuli yavuze ko COVID-19 yatumye abantu bo mu bindi bihugu bajya muri Guma mu rugo, bihungabanya ibikorwa by’ubukungu binatera inzara no kubura ibyo kurya mu bihugu byabo, yemeza ko we yahisemo gukomeza gufungura ibikorwa byose kuko igifu kitumva Guma mu rugo ahubwo gikomeza gusaba ibyo kurya.

Yahamagariye Abanya-Tanzania gutunganya ibicuruzwa byinshi no guhinga ibyo kurya kugira ngo bubake ubukungu butajegajega, nk’uko babashije kwinjira mu bihugu bike bya Afurika bifite ubukungu buringaniye, bityo abasaba gukomeza gukora cyane batikoresheje, ndetse asaba n’abashoramari kujya gushora imari muri icyo gihugu.

Tanzania iri mu bihugu bike byo ku Isi bitigeze bishyira imbaraga nyinshi mu kurwanya COVID-19 kuko Perezida Magufuli yatangaje ko bamaze kuyihashya n’ubwo inzego z’ubuzima ku Isi zitigeze zibyemeza.

Perezida wa Tanzania, Dr John Pombe Magufuli yavuze ko Imana izabafasha gutsinda ibyorezo birimo na COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .