Tanzania: Kera kabaye abaturage bongeye gukangurirwa kwirinda COVID-19

Yanditswe na Ntabareshya Jean de Dieu
Kuya 22 Gashyantare 2021 saa 07:48
Yasuwe :
0 0

Guverinoma ya Tanzania yashyize iva ku izima ihamagarira abaturage kubahiriza ingamba nshya zo kwirinda ikwirakwira rya COVID-19 nyuma y’igihe kirekire bavuga ko nta cyorezo bafite mu Gihugu.

Muri Tanzania hagiye humvikana inkuru nyinshi mu bihe bitandukanye, zimwe zivuga ko nta Coronavirus ihari mu gihe Umuryango w’Abibumye wita ku buzima OMS, n’ibihugu by’amahanga byagiye bitunga agatoki iki Gihugu.

Ni kenshi Perezida John Pombe Magufuli yagiye yumvikana ahamagarira abaturage kutita cyane ku cyorezo n’amabwiriza yo kucyirinda kuko nta gihari ndetse bigera n’aho muri Mata 2020 Guverinoma ifata umwanzuro wo kutazongera gutangaza amakuru mashya kuri iki cyorezo.

Bitandukanye n’ibyo Tanzania yatangazaga ko nta Coronavirus ihari, ubu noneho Leta irifuza ko abanya-Tanzania bose guhagurukira ingamba zigera ku munani zashyizweho zo gutsinda icyorezo cya cya COVID-19.

Uretse amasengesho y’iminsi itatu yasojwe ku Cyumweru taliki ya 21 Gashyantare 2021, Minisiteri y’ubuzima yasohoye itangazo ko ivuga Abanya-Tanzania bose basabwa kwitabira ibijyanye n’isuku nk’uko inzobere mu buzima zibiteganya.

Muri ibyo harimo gukaraba intoki n’amazi n’isabune ndetse no gukoresha umuti wica udukoko ku ntoki [sanitizer] mu gihe nta mazi meza n’isabune bihari.

Bongeye gushimangira ko igihugu kitazagira ibihe bya Guma mu rugo bityo Minisiteri isaba abaturage kurushaho gukora imyitozo ngororamubiri, kurinda cyane abantu bakuze, abafite umubyibuho ukabije n’abafite ibibazo by’umubiri bitandukanye.

Minisiteri kandi yagiriye abaturage inama yo kurya indyo yuzuye, by’umwihariko imbuto n’imboga no kwambara neza agapfukamunwa.

Leta ya Tanzania yatangiye gushishikariza abaturage kwirinda Covid-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .