Tanzania: Abaturage basabwe gutangira kwambara agapfukamunwa

Yanditswe na IGIHE
Kuya 21 Gashyantare 2021 saa 07:20
Yasuwe :
0 0

Minisitiri w’Intebe muri Tanzania, Kassim Majaliwa, yasabye abaturage b’iki gihugu gutangira kwambara agapfukamunwa igihe hagati yabo n’abandi bantu harimo intera iri munsi ya metero imwe kugira ngo hirindwe ikwirakwira rya COVID-19.

Mu busanzwe kwambara agapfukamunwa muri Tanzania ntibyari itegeko kereka nk’igihe umuntu agiye mu nyubako zikoreramo inzego za Leta.

Kuri uyu wa 20 Gashyantare 2021, ni bwo Minsitiri w’Intebe, Kassim Majaliwa, yavuze ko ari ngombwa ko umuturage yambara agapfukamunwa kugira ngo hirindwe ikwirakwira rya COVID-19.

Yagize ati “Ambara agapfukamunwa igihe imirimo yawe y’umunsi ku wundi igusaba gutanga cyangwa kwakira serivisi isaba ko wowe n’abandi muhana intera iri munsi ya metero imwe, kugira ngo ugabanye ibyago byo kwandura COVID-19, binyuze mu kuba amacandwe y’undi muntu yagukoraho. Nta wabibujije. Ni ingenzi ko buri wese yirinda.”

Tanzania iri muri bimwe mu bihugu ku Isi bitigeze bishyiraho ingamba zikarishye zo kwirinda COVID-19 dore ko na Perezida John Pombe Magufuli aherutse gutangaza ko adashobora gushyiraho Guma mu rugo ko ahubwo igikwiye ari amasengesho. Kugeza ubu Tanzania itangaza ko yamaze guhashya COVID-19.

Minisitiri w'Intebe wa Tanzania, Kassim Majaliwa yasabye abaturge gutangira kwambara agapfukamunwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .