Zimbabwe: Perezida Mugabe yasohotse mu nama igitaraganya itarangiye

Yanditswe na Uwishyaka Jean Louis
Kuya 1 Nzeri 2016 saa 10:08
Yasuwe : XX
0

Umukambwe Robert Mugabe Perezida wa Zimbabwe, yavuye mu nama ya SADC yari yitabiriye muri Swaziland itarangiye kubera uburwayi.

Perezida Mugabe w’imyaka 92, yari yitabiriye inama ngarukamwaka ihuza ibihugu by’Umuryango wo mu Majyepfo ya Afurika ku iterambere SADC (Southern African Development Community) yaberaga i Mbabane muri Swaziland, gusa iyi nama Perezida Mugabe ntiyayirangije dore ko yagiye ibura umunsi umwe.

Nyuma yo gusohoka muri iyi nama, Perezida Mugabe ngo yabanje gufata isaha yose aruhutse mbere y’uko afata indege yihariye imwerekeza muri Dubai aho yagiye kwivuriza.

Mugabe akigera ku kibuga cy’indege mu gihugu cye ahagana saa moya n’iminota 44 z’ijoro ngo ntiyahatinze kuko saa yine z’ijoro yari yamaze kuhava kare.

Ikinyamakuru Citizen dukesha iyi nkuru cyanditse ko amakuru aherukwa gutangwa kuri Mugabe ari uko yari yitabiriye inama muri Swaziland gusa nta kintu cyari cyavugwa ku byerekeye iby’uburwayi bwe bwatumye agenda inama itarangiye.

Muri iyi minsi ngo Perezida Mugabe yari amaze iminsi ajya kwivuriza muri Singapore bikavugwa ko yaba arwaye kanseri y’ubugabo bw’epfo (prostate cancer) ikunze kwibasira abantu bakuze, gusa we avuga ko aba yagiye kwivuza amaso.

Hagati aho, Minisitiri w’ingabo muri Zimbabwe, Sydney Sekeremayi ku wa Gatatu w’iki cyumweru yatangaje ko inzego z’umutekano zirimo guhangana n’abadashyigikiye ubutegetsi bwa Perezida Mugabe.

Minisitiri w’Ingabo kandi yananyomoje ibihuha byavugaga ko hari abapolisi n’abasirikare bifatanyije n’abarwanya ubutegetsi.

Ati” Inzego zose z’umutekano ziri inyuma ya guverinoma , ntidushobora kwifatanya n’abadakurikiza amategeko bifuza ko Itegeko Nshinga ryavanwaho.”

Abaturage muri Zimbabwe usanga bahora mu myigaragambyo bamaganga ubutegetsi bwa Perezida Mugabe bavuga ko agomba kuvaho cyane bitewe n’ibibazo by’ubukungu n’ubushobomeri byugarije igihugu, gusa we akomeza gushimangira ko azava ku butegetsi ari uko yapfuye.

Ni kenshi Perezida Mugabe yakunze gufotorwa yasinziriye mu nama zinyuranye, ubundi yitura hasi, benshi mu babibona babihuza n’imyaka afite bakavuga ko yaba afite uburwayi.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza