Sudani y’Epfo yahinduye isaha yagenderagaho

Yanditswe na Dufitumukiza Salathiel
Kuya 29 Mutarama 2021 saa 06:54
Yasuwe :
0 0

Minisiteri y’Abakozi muri Sudani y’Amajyepfo yatangaje ko icyo gihugu kizatangira kugendera ku masaha avuguruye kuva ku wa 1 Gashyantare 2021, aho isaha ngenderwaho izasubizwaho inyuma isaha imwe ku isaha ngengamasaha, GMT.

Mu itangazo iyo minisiteri yasohoye ku wa 28 Mutarama 2021, yavuze ko icyo cyemezo cyafashwe hashingiwe ku hantu nyakuri icyo gihugu giherereye ku ikarita y’Isi.

Sudani y’Amajyepfo ibarwa mu bihugu biherereye mu Majyaruguru ashyira Uburasirazuba bwa Afurika.

Ubusanzwe muri icyo gihugu igihe kibarwa hongerwa amasaha atatu ku isaha mpuzamahanga y’ifatizo (UTC/GMT +3), ariko guhera muri Gashyantare 2021 kizajya kibarwa hongerwaho abiri (UTC/GMT +2).

Ni ukuvuga ko ku wa 1 Gashyantare 2021 saa 1:00 z’ijoro isaha yaho izasubira inyuma ihite itangira kubara saa 00:00.

Inzego zitandukanye zirimo iz’abikorera, iza leta, imiryango mpuzamahanga, abahagarariye ibihugu by’amahanga muri icyo gihugu n’iza gisivile zamenyeshejwe izo mpinduka, ndetse hasobanurwa ko amasaha y’akazi azakomeza kuba saa 8:00 z’igitondo kugeza saa 5:00 z’umugoroba.

Ntibimenyerewe cyane guhindura igihe ngenderwaho mu gihugu cyangwa akarere runaka, ariko hari aho byagiye bikorwa. Iki gihugu si icya mbere cyahinduye amasaha.

Ni ryari igihugu gishobora guhindura isaha kigenderaho?

Mu 2011 igihugu cya Samoa giherereye muri Océanie cyahinduye igihe ngenderwaho, gitaruka umunsi umwe ku ngengabihe y’umwaka. Icyo gihe ku ngengabihe yacyo cyatarutse ku wa Gatanu tariki 30 Ukuboza.

Hasobanuwe ko cyashakaga kugendana n’ibihugu bituranyi byacyo birimo Australie na Nouvelle-Zélande byagendaga imbere yacyo ho umunsi wose, bikabangamira ubwumvikane hagati y’ibyo bihugu nacyo.

Mu 2007 uwari Perezida wa Venezuela, Hugo Chavez, yasubijeho inyuma iminota 30 ku isaha igihugu kigenderaho ugendeye kuri GMT, ndetse n’u Bufaransa bwari imbere ho iminota icyenda ubu buyigenda imbere isaha yose.

Ubundi isaha ya GMT yashyizweho n’Inama Mpuzamahanga igena igihe yabereye i Washington D.C ku wa 1 Ukwakira 1884, yari yatumijwe n’uwari Perezida wa Leta Zunze Ubumwe za Amerika, Chester A. Arthur.

Inama yemeje ko umunsi umwe ugomba kuba ugizwe n’amasaha 24 mu Isi hose, akabarwa kuva saa sita z’ijoro bahereye ku mirongo miganda y’amasaha iva ku mpera za ruguru y’isi ikagera ku mpera z’epfo (méridien).

Kuki Sudani yahinduye isaha?

Mu byumweru bibiri bishize nibwo Inteko Ishinga Amategeko ya Sudani y’Amajyepfo yemeje ko isaha icyo gihugu kigenderaho ikwiye guhinduka, bituma benshi bacika ururondogoro cyane cyane abakoresha imbuga nkoranyambaga.

Byateje urunturuntu mu bagize guverinoma birinze kugira byinshi babivugaho, ariko hakibazwa uko igihugu gifite byinshi byo gukemura cyafata umwanya wo kujya mu byo guhindura amasaha, aho gukora ibibabaje cyane.

Amaherezo y’inzira ariko yabaye mu nzu, Minisiteri y’Abakozi itangaza ko mu kwezi gutaha icyo gihugu kizatangira kugendera ku masaha mashya.

Sudani y’Amajyepfo iherereye mu Majyaruguru ashyira Uburasirazuba bwa Afurika, ariko igendera ku isaha y’Akarere k’Uburasirazuba.

Umuvugizi wa Guverinoma, Michael Makuei Lueth, yabwiye The East African ko isaha icyo gihugu gisanzwe kigenderaho inyuranyije n’aho giherereye ubariye kuri GMT.

Yagize ati ”Igihe tugenderaho ntabwo ari cyo twakabaye tugenderaho mu by’ukuri […]dukwiye kuba turi imbere amasaha abiri ku isaha ya GMT [aho kuba atatu].”

Impinduka nizitangira gukurikizwa, icyo gihugu ntikizongera kugendera ku isaha yo mu karere ka Afurika y’Iburasirazuba, ahubwo kizagendana n’isaha y’ibihugu byo mu Majyaruguru y’uwo Mugabane birimo Misiri, Sudani na Tchad.

Guhera muri Gashyantare Sudani y'Epfo izahindura amasaha yagenderagaho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .