Sudani y’Epfo:Loni yirukanye Umuyobozi w’ingabo zibungabunga amahoro

Yanditswe na Kanamugire Emmanuel
Kuya 2 Ugushyingo 2016 saa 07:18
39 26

Umunyamabanga Mukuru wa Loni, Ban Ki moon, yirukanye umuyobozi w’ingabo zishinzwe kubungabunga amahoro muri Sudani y’Epfo nyuma ya raporo yagaragajwe ivuga ko zananiwe kurengera ubuzima bw’abasivile muri Nyakanga uyu mwaka.

Abakozi b’imiryango itabara imbabare bareze ko batitaweho n’ingabo za Loni ubwo ingabo za Leta zabagabagaho igitero i Juba, nk’uko iyi raporo ibisobanura.

Mu mirwano yashyamiranyije ingabo za leta n’abahoze mu mitwe y’inyeshyamba hishwe umunyamakuru umwe, abakozi bo mu miryango itabara imbabare bafatwa ku ngufu.

Imirwano yadutse hagati y’ingabo za Perezida Salva Kiir n’iz’uwahoze ari visi perezida we Riek Machar.

Ban Ki moon yasabye ko uyu munyakenya Lt Gen Johnson Mogoa Kimani Ondieki, ahita asimbuzwa.

Loni kandi yatangaje ko yatangije iperereza ku mvururu zo ku wa 8- 11 Nyakanga uyu mwaka mu murwa mukuru wa Sudani y’Epfo.

Mu mirwano yamaze iminsi itatu, nibura abantu 73 barishwe barimo 20 bashakaga ubutabazi bwa Loni, n’abasirikare babiri bo mu ngabo zishinzwe kubungabunga amahoro, nk’uko BBC yabyanditse.

Ukubura ubushishozi kwa bamwe mu bayobozi bakuru ba Unmiss byateye ibibazo byinshi birimo n’amakimbirane hagati y’ingabo ziri muri ubu butumwa zirimo izikomoka mu Bushinwa, Ethiopia, Nepal n’u Buhinde.

Umuryango Mpuzamahanga ufite ingabo zigera ku bihumbi 16 muri Sudani y'Epfo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE