Sudan y’Epfo yasabye igihe cyo kwishyura ibirarane ibereyemo EAC

Yanditswe na HABIMANA James
Kuya 29 Kamena 2019 saa 10:54
Yasuwe :
0 0

Igihugu cya Sudan y’Epfo cyavuze ko Umuryango wa Afurika y’Iburasirazuba, EAC udakwiye kuba uyihagaritse kubera amadeni kiwufitiye, ko ahubwo cyahabwa igihe kugira ngo cyishyure.

Iki gihugu cyavuze ko gifite ikibazo cy’ubukungu gusa ngo kirimo gukora ibikenewe kugira ngo cyishyure, nk’uko Minisitiri w’ubucuruzi, inganda n’Umuryango wa Afurika y’Iburasirazuba yabivuze.

Mu kiganiro yahaye ikinyamakuru The East African ari mu Bushinwa, Paul Mayom Akech, yavuze ko igihugu cye cyiteguye kwishyura uyu muryango ibirarane.

Uyu muyobozi avuze ibi nyuma yaho ubwo hatangazwaga ingengo y’imari y’uyu muryango y’umwaka wa 2019/2020 ingana na miliyoni 110 z’amadorali, byatangajwe ko kugeza ubu ibihugu birimo Sudan y’Epfo n’u Burundi, bitarishyura imisanzu biberemo uyu muryango.

Mayom yagize ati “Guverinoma ya Sudan y’Epfo yagiye ishyiraho gahunda zigamije kubahiriza amabwiriza ya EAC ariko bikeneye ko duhabwa igihe, dufite ibibazo by’ubukungu ariko ubu iki kibazo kiri muri Minisiteri y’imari, turabwira ibihugu bigize uyu muryango ko bigomba kutwihanganira.”

Yavuze ko mu gihe kiri imbere bazashyira mu bikorwa ibyo biyemeje kandi bakomeze kubahiriza inshingano zabo nk’umunyamuryango wa EAC.

Ikibazo cy’ubukungu kiri muri Sudan y’Epfo, gikomeje kwigaragaza. Iki gihugu cyahisemo kujya giha u Bushinwa utugunguru 30 twa peteroli ku munsi nacyo kikabubakira imihanda.

Ingingo ya 146 y’uyu muryango ivuga ko igihugu kimwe gishobora guhagarikwa mu bikorwa bimwe, mu gihe cyaba kinaniwe kubahiriza ibyo gishinzwe biri mu masezerano birimo kutishyura amafaranga mu gihe cy’amezi 18.

Buri gihugu kigize EAC gisabwa gutanga miliyoni 8 z’amadorali buri mwaka, Sudan y’Epfo yagiye muri uyu muryango mu 2016 ntabwo yubahirije ibyo isabwa kuko igejeje ibirarane bingana na miliyoni 27 z’amadorali.

Sudan y'Epfo ikeneye igihe cyo kwishyura ibirarane ibereyemo EAC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza