Sudan y’Epfo: Perezida Kiir yahaye imbabazi Machar n’abandi barwanyi

Yanditswe na Mukaneza M.Ange
Kuya 9 Kanama 2018 saa 08:59
Yasuwe :
0 0

Perezida wa Sudani y’Epfo, Salva Kiir, yahaye imbabazi Dr Riek Machar uyobora umutwe utavuga rumwe n’ubutegetsi bwe n’abandi barwanyi b’imitwe yitwaje intwaro bari hirya no hino mu gihugu.

Mu itangazo ryanyuze kuri televiziyo y’igihugu ku wa Gatatu, Kiir yatangaje iteka no 14 ryo mu 2018 riha imbabazi zisesuye Machar uyobora umutwe wa SPL-IO ndetse n’indi mitwe yose yari mu ntambara na Leta ya Sudani y’Epfo.

The East African ivuga ko Perezida Kiir, yanategetse ingabo kwemerera imiryango ikora ibikorwa by’ubutabazi kugera ku bakeneye ubufasha bose, kandi amasezerano arebana no guhagarika intambara akubahirizwa.

Ibi abikoze mu gihe ku Cyumweru we na Machar bashyize umukono ku masezerano arebana no kugabana ubutegetsi n’umutekano muri Sudani y’Epfo, mu biganiro byo kugarura amahoro byaberaga i Karthoum muri Sudan.

Aya masezerano ni aya kabiri ashyizweho umukono, aya mbere yasinywe mu 2015 ntiyubahirijwe ndetse hubura imirwano Machar afata umwanzuro wo guhunga. Kuri iyi nshuro ariko bombi biyemeje gushyira mu bikorwa ibyo bemeranyije.

Sudan y’Epfo yabonye ubwigenge kuri Sudan mu 2011, nyuma y’imyaka ibiri gusa ariko yahise yinjira mu ntambara y’abasivili yatewe n’ubwumvikane buke hagati ya Perezida Kiir na Machar wari Visi Perezida we.

Umuryango w’Abibumbye ugaragaza ko iyi ntambara yatumye ibihumbi bitakaza ubuzima, abasaga miliyoni enye nabo bava mu byabo.

Perezida Salva Kiir yahaye imbabazi Machar bahoze bahanganye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza