Sudani irashinjwa gukoresha intwaro z’ubumara yica abaturage ba Darfour

Yanditswe na Jean Pierre Tuyisenge
Kuya 29 Nzeri 2016 saa 06:34
Yasuwe : XX
0

Umuryango uharanira uburenganzira bw’ikiremwamuntu ku Isi, Amnesty International, wasohoye icyegeranyo gishinja Leta ya Sudani gukoresha intwaro z’ubumara yica abaturage bo mu gace ka Jebel Marra, kari mu burengerazuba bw’Intara ya Darfour.

Uyu muryango uvuga ko ushingiye ku mafoto yafatishijwe icyogajuru,ubushakashatsi wakoze ku bantu 200 bagizweho ingaruka n’ibitero,ngo hari abana n’abandi bantu bagaragaweho ibikomere bikabije.

Ukomeza uvuga ko byakorewe iperereza bagasanga nibura harabaye ibitero by’intwaro z’ubumara bigera kuri 30 mu gace ka Djebel Marra muri Darfour, kuva mu kwezi kwa Mutarama 2016 ndetse ngo icya nyuma kikaba cyarabaye ku wa 9 Nzeri 2016.

Umuyobozi ushinzwe ibikorwa by’uwo muryango,Tirana Hassan yagize ati “ Biragoye kugira icyo umuntu avuga ku bibi nabonye. Iyo witegereje amafoto n’amashusho nabonye, aho abana barizwa n’ububabare hafi yo gupfa, abandi ntibakibasha no guhumeka, abandi bararuka amaraso.”

RFI dukesha iyi nkuru ivuga ko ibyo uyu muryango uvuga bihabanye n’ibyatangajwe na Perezida wa Sudani, Omar Bashir ubwo yahuraga na Perezida Idriss Deby wa Tchad, na Tamim Ben Hamad al Thani wo muri Qatar i el-Facher, mu mujyi mukuru wa Darfour ku wa 7 Nzeri 2016, aho yatangaje ko muri ako gace hari amahoro.

Yagize ati “ Turatangariza abantu bose bo muri Darfour no muri Sudani ko twujuje ibyo twasabwaga.Darfour imeze neza cyane ugereranyije n’uko yari imeze ejo, kandi izakomeza kumera neza no mu bihe bizaza.”

Icyegeranyo gikomeza kivuga ko igisirikare cya Leta ya Sudani kitwaza ko kiri kurwanya umutwe washinzwe na Abdul Wahid Elnur utavuga rumwe n’ubutegetsi kigakoresha izo ntwaro.

Yves Prigent ushinzwe gahunda z’imishinga muri uwo muryango yagize ati “ Ingo 170 zatwitswe n’izo ntwaro kandi ubu nta muntu wo hanze wemerewe kwinjira muri ako gace”.

Intambara yo mu gace ka Darfour yatangiye muri Gashyantare 2003, ubwo umutwe wavugaga ko uharanira kubohora Sudani (SLM) n’undi wavugaga ko uharanira Ubutabera n’Uburinganire (JEM) byatangiye kurwanya Leta ya Sudani buyishinja gutoteza abaturage batavuga Icyarabu.

Perezida Omar-al-Bashir avuga ko i Darfour hari amahoro
Ikarita iriho agace ka Jebel Marrah

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza