Sierra Leone yasheshe amasezerano n’u Bushinwa yo kubaka ikibuga cy’indege cy’asaga miliyoni 300$

Yanditswe na Mukaneza M.Ange
Kuya 12 Ukwakira 2018 saa 10:04
Yasuwe :
0 0

Leta ya Sierra Leone yasheshe amasezerano yari yagiranye n’u Bushinwa, bwagombaga gutanga inguzanyo ya miliyoni 318 z’amadolari yo kubaka ikibuga cy’indege.

Muri Werurwe nibwo Ernest Bai Koroma wari Perezida w’iki gihugu yatangije uyu mushinga byari biteganyijwe ko uzashyirwa mu bikorwa n’ikigo cyo mu Bushinwa, ukarangira mu 2022.

Ibaruwa Minisiteri y’Ubwikorezi no gutwara abantu mu ndege yandikiye uwari ushinzwe uyu mushinga, ivuga ko uyu mwanzuro wafashwe kubera ko cyaba ari igihombo kubaka ikindi kibuga hanze y’Umujyi wa Freetown mu gihe n’igihari kitabyazwa umusaruro.

Ikibuga cy’indege kiri mu Mujyi wa Lungi biteganyijwe ko ari icyo kizavugururwa, kinengwa kuba kidafite uburyo bunoze bugihuza n’Umurwa Mukuru Freetown.

Mu kiganiro yagiranye na BBC, Minisitiri Kabineh Kallon yavuze ko aho kubaka ikibuga gishya, bazavugurura icyari gisanzwe. Ati “Mfite uburenganzira bwo gufata umwanzuro ufitiye igihugu akamaro.”

Umuvugizi wa Minisiteri y’Ububanyi n’Amahanga y’u Bushinwa, Lu Kang, yatangaje ko uku gusesa amasezerano nta mwuka mubi byateje hagati y’ibihugu byombi, cyane ko umushinga wari ukiri mu nyigo kandi umubano na Afurika ushingiye ku nyungu z’impande zombi.

Ati “Sintekereza ko uyu mushinga ukwiye gufatwa nk’ikimenyetso cy’ibibazo hagati ya Guverinoma y’u Bushinwa na Sierra Leone.”

Sierra Leone iza mu bihugu bikennye cyane muri Afurika ivugwaho kuba ku butegetsi bwa Koroma wayoboye kuva mu 2007 kugeza muri Mata 2018, yarahawe inguzanyo ya miliyoni 224 z’amadolari n’u Bushinwa.

Akimara kujya ku butegetsi ariko Perezida Julius Maada Bio wamusimbuye yagerageje gukora amavugurura muri imwe mu mishinga isaba amafaranga yagiye ikorwa na Koroma.

Umwanzuro wo guhagarika iyubakwa ry’ikibuga cya Mamamah International Airport wafashwe nyuma y’uko Ikigega Mpuzamahanga cy’Imari, FMI, kigaragarije Sierra Leone ko ishobora kuzisanga yaremerewe n’amadeni.

Leta ya Sierra Leone yasheshe amasezerano yari yagiranye n’u Bushinwa

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza