Kwamamaza

RDC yohereje intumwa yo gutakambira Amerika ngo idafatira ibihano abayobozi b’igihugu

Yanditswe kuya 17-09-2016 saa 17:57' na IGIHE


Umujyanama wa Perezida wa Repubulika Iharanira Demokarasi ya Congo, Joseph Kabila, mu bijyanye na Dipolomasi, Barnabé Kikaya kuri uyu wa Gatanu yatangaje ko ari muri Leta Zunze Ubumwe za Amerika, kumvisha iki gihugu cy’igihangange kudafatira ibihano abayobozi ba Congo ahubwo ngo gishyigikire ibiganiro bikomeje hagati ya Leta n’abatavuga rumwe n’ubutegetsi.

Mu kiganiro uyu mujyanama yagiranye na Reuters ari muri Washington yatangaje ko yaganiriye n’abayobozi muri Amerika ndetse n’abanyamategeko ku bijyanye n’ibiganiro byatangiye byo gushyiraho guverinoma y’inzibacyuho muri Congo ndetse ashimangira ko Perezida Kabila nta mugambi afite wo guhindura itegeko Nshinga rimwemerera kongera kwiyamamaza.

Ati ‘‘Ndi mu butumwa bw’ubuvugizi kubera ko hari imyanzuro ibiri yari iri mu Nteko Ishinga Amategeko yo gufatira ibihano abayobozi ba Congo.’’

Kikaya yavuze ko ashaka kumvisha abayobozi ba Leta Zunze Ubumwe za Amerika ko ibihano atari uburyo bwiza bwafasha Repubulika Iharanira Demokarasi ya Congo gukemura ibibazo ifite.

Washington iri mu biganiro byo gufatira ibihano abayobozi ba Repubulika Iharanira Demokarasi ya Congo, bakomeje kugira uruhare mu gutinza amatora.

Muri RDC hari gukorwa ibiganiro bya politiki aho abayobozi mu nzego zinyuranye bashaka umuti w’umwuka mubi ukomeza gututumba mu gihugu, ushingiye ahanini ku kuba nta bimenyetso by’ikorwa ry’amatora, mu gihe manda ya Perezida Kabila izarangirana n’uyu mwaka kandi akaba atemerewe kongera kwiyamamaza.

Abatavuga rumwe n’ubutegetsi baramagana icyo gikorwa bavuga ko kigamije kugumisha Kabila ku butegetsi, ndetse hari abamaze gutabwa muri yombi kubera imyigaragambyo.

Umwe mu bayobozi muri Minisiteri y’Ububanyi n’Amahanga muri Leta Zunze Ubumwe za Amerika ariko utatangajwe amazina, we yavuze ko igihugu cye gishyigikiye ibyo biganiro binitabirwa n’abatavuga rumwe n’ubutegetsi ndetse n’imiryango itegamiye kuri leta.

Kuri uyu wa Gatanu kandi Leta Zunze Ubumwe za Amerika zashimangiye ko zitazazuyaza gufatira ibihano abayobozi bose muri RDC bazanyuranya n’inzira za demokarasi no kubangamira ibikorwa by’amatora.

Barnabé Kikaya yahakanye ko Kabila yaba ashaka kuguma ku butegetsi, aho yavuze ko Itegeko Nshinga rivuze byinshi kuri we kandi ritazigera ryirengagizwa, nubwo atabasha gusobanura impamvu itariki y’amatora ya Perezida wa Repubulika idatangazwa.

Abatavuga rumwe n’ubutegetsi basaba ko amatora ya Perezida wa Repubulika yihutishwa,ariko ubutegetsi bukavuga ko hagomba kubanza amatora y’inzego z’ibanze,ay’Umukuru w’Igihugu agakorwa nyuma.

Barnabé Kikaya, Umujyanama wa Perezida Joseph Kabila

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 27 September 2016
Copyright © 2009 -2014 - IGIHE Ltd - All Rights Reserved