RDC yemeye ko hakorwa ubucukuzi bwa peteroli muri pariki zirimo na Virunga

Yanditswe na Mukaneza M.Ange
Kuya 30 Kamena 2018 saa 12:24
Yasuwe :
0 0

Guverinoma ya Repubulika Iharanira Demokarasi ya Congo (RDC), yafashe umwanzuro wo gutanga uburenganzira bwo gucukura peteroli muri Pariki za Virunga na Salonga.

Uyu mwanzuro ariko ntushyigikiwe n’imiryango ibungabunga ibidukikije aho bavuga ko gucukura iyi peteroli bizashyira mu kaga ubuzima bw’inyamaswa zibamo zirimo ingagi, inzovu n’izindi, ndetse bigateza ubushyuhe bwinshi ku Isi.

Izi pariki zombi ziri mu murage w’Isi ugenzurwa n’Ishami rya Loni rishinzwe Uburezi n’Umuco, UNESCO; Salonga iri ku buso bwa kilometero kare ibihumbi 36 iza ku mwanya wa kabiri mu mashyamba manini ya kimeza nyuma ya Amazon.

Nk’uko BBC dukesha iyi nkuru yabyanditse, Guverinoma ya RDC yagaragaje ko ifite uburenganzira bwo gutanga uruhushya rwo gucukura peteroli aho ariho hose mu gihugu kandi itirengagije gusigasira inyamaswa n’ibimera biri muri izi pariki.

Hahise hashyirwaho komisiyo zifite inshingano yo kugaragaza ibice bizacukurwamo peteroli, aho muri Pariki ya Virunga iza mu za mbere zimaze igihe kinini zibamo inyamaswa muri Afurika, izacukurwa kuri kilometero kare 1720, zingana na 21.5% by’ubuso bwose.

Leta yemeje ko iyi pariki icukurwamo peteroli mu gihe guhera mu ntangiriro z’uyu mwaka yabaye ifunzwe kugeza mu 2019, umwanzuro wafashwe nyuma y’uko bamukerarugendo babiri b’Abongereza bashimuswe, umugore wakoraga akazi ko kuyicunga akicwa.

Aka gace gakunze kugaragaramo imvururu n’umutekano muke bigenda bifata indi ntera; umwaka ushize habaruwe abashinzwe gucunga pariki 12 baguye mu mirwano n’imitwe yitwaje intwaro ndetse na ba rushimusi.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza