Abanyarwanda 34 bari bamaze iminsi ine bafungiwe i Goma

Yanditswe na Philbert Girinema
Kuya 18 Ugushyingo 2016 saa 01:34
Yasuwe :
0 0

Inzego zishinzwe abinjira n’abasohoka muri Repubulika Iharanira Demokarasi ya Congo, kuri uyu wa Kane tariki 17 zagaruye mu gihugu Abanyarwanda 34 bari bambutse umupaka bakinjira ku butaka bwayo nta byangombwa.

Aba banyarwanda barimo abenshi bafashwe n’inzego z’umutekano mu gace ka Nyiragongo muri Kivu y’Amajyaruguru, amakuru akavuga ko bari bambutse bagiye gushaka inka yabo yari yibwe.

Radio Okapi yavuze ko ubwo bagarurwaga, abasirikare ba Congo babashyikirije inzego z’abinjira n’abasohoka, hari n’intumwa z’urwego rushinzwe gukemura ibibazo byo ku mipaka.

Umuvugizi w’Ingabo za RDC ziri mu bikorwa byo kurwanya imitwe yitwaje intwaro mu Burasirazuba bw’icyo gihugu, Maj Ndjike Kaiko, yagize ati ‘‘Nyuma y’igenzura twakoze, twasanze bose ari abasivili. Twagombaga kubasubiza iwabo, ingabo zacu zubahiriza uburenganzira mpuzamahanga bwa muntu. Niyo mpamvu iki gikorwa twashatse kucyereka amaso mpuzamahanga.’’

Aba bantu uko ari 34 bamurikiwe abasirikare bahuriweho b’Umuryango w’Ibihguu by’Ibiyaga bigari n’itangazamakuru, mbere yo kugarurwa mu Rwanda.

Umuyobozi w’Akarere ka Rubavu, Sinamenye Jeremy, yabwiye IGIHE ko abafashwe koko bagiye batabaye mugenzi wabo wari wibwe inka, ndetse nta kibazo bahuye nacyo bari muri RDC.

Ati “Nibyo koko ejo warababonye, ni Abanyarwanda bari bambutse umupaka batabaye mugenzi wabo wari wibwe inka, noneho mu kuyikurikirana, barenga umupaka uduhuza na Repubulika Iharanira Demokarasi ya Congo, bahita bajya kubafungira i Goma.”

Abo banyarwanda bafashwe ku Cyumweru bari 29 bo mu Murenge wa Busasamana mu Karere ka Rubavu, ariko kuri uyu wa Kane, RDC yabagaruye mu Rwanda bari kumwe n’abandi batatu bari barafashwe, barimo n’umugore ufite abana babiri.

Meya Sinamenye yavuze ko ubusanzwe Abanyarwanda n’abanye-Congo bagenderanirana bifashishije imipaka itatu irimo Grande Barrière, Petite Barrière n’umupaka wa Kabuhanga uri mu Murenge wa Bugeshi, asaba ko abaturage batakongera gupfa kwambuka mu buryo butazwi n’inzego zibishinzwe.

Si ubwa mbere abaturage barenga umupaka w’igihugu kimwe bakajya mu kindi, kuko mu minsi ishize hari n’abasirikare ba Repubulika Iharanira Demokarasi ya Congo bagiye bafatirwa mu Rwanda barenze umupaka, bagasubizwayo.

Ku mupaka utandukanya u Rwanda na Congo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza