Kwamamaza

RDC: Perezida Kabila yaciye amarenga yo kwiyamamariza manda ya gatatu

Yanditswe kuya 13-11-2016 saa 12:47' na Nsengimana Evariste


Ubwo yahuraga n’ intumwa z’akanama gashinzwe umutekano mu Muryango w’Abibumbye, Perezida wa Repubulika Iharanira Demokarasi ya Congo, Joseph Kabila yazemereye ko Itegeko Nshinga ry’iki gihugu ritemera manda ya Gatatu, ariko aberurira ko riramutse rivuguruwe nta kosa ryaba rikozwe.

Izi ntumwa ziri muri iki gihugu kuva ku wa Gatanu tariki 11 Ugushyingo 2016, mu ruzinduko rugamije kuganira n’abayobozi b’igihugu uburyo ibibazo bya politiki n’iby’umutekano biriyo byakemuka.

Ubwo bahuraga na Perezida Kabila n’abandi bayobozi bakuru muri Guverinoma, ku ngingo yo kutiyamamariza manda ya gatatu, Kabila yabwiye izi ntumwa ko iyi manda idateganywa n’Itegeko Nshinga, ariko ko haramutse habayeho ko rivugururwa zikongerwa nta tegeko byaba byishe.

Africa News ivuga ko aba bakozi ba ONU basabye Leta ya Congo guha uburenganzira busesuye abaturage n’abatavuga rumwe nayo bwo kwigaragambya. Basabye kandi ko abayobozi muri iki gihugu bakwiye kwibutswa inshingano zabo mu rugamba rwo kugarura amahoro mu gihugu.

Basabye na none Leta gufungura iminara (signal) ya Radiyo Mpuzamahanga y’Abafaransa (RFI) yafunzwe mu cyumweru gishize.

Kuva mu ntangiriro z’iki cyumweru, ntibyashobokaga kumva iyi radiyo mu murwa mukuru Kinshasa.

Icyemezo cyo gufunga iyo minara cyafashwe kandi gishyirwa mu bikorwa mbere y’imyigaragambyo abatavuga rumwe n’ubutegetsi bateganyaga, icyemezo cyamaganwe n’imiryango mpuzamahanga, ndetse n’ibindi bihugu by’amahanga.

Nyuma y’ifungwa rya RFI, Minisitiri w‘Ubutabera, Alexis Thambwe Mwamba, yirinze kugira byinshi abivugaho, ati “Oya, Oya. Ndibaza ko ari ikibazo kigiye gukemuka kandi mu buryo bwihutirwa. Ndabibijeje.”

Ismael Abraao Gaspar Martins, umwe mu bagize iri tsinda avuga ko bizeye ko intego bihaye yo gufasha Congo kuva mu bibazo bya politiki bazayigeraho.

Imiryango mpuzamahanga itegamiye kuri Leta yasabye ko abayobozi bakuru muri Leta ndetse n’abashinzwe umutekano bijanditse mu mvururu zabaye muri iki gihugu ndetse n’ibikorwa byahungabanyije uburenganzira bwa muntu bahanwa.

Perezida Kabila yavuze ko kuvugurura Itegeko Nshinga hongerwa umubare wa manda nta kibazo kirimo
Intumwa za Loni zasabye Leta ya Congo guha uburenganzira abaturage n'abatavuga rumwe nayo bashaka kwigaragambya

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved