Kwamamaza

RDC: Minisitiri azakemura ate ibyananiye ba Perezida Mandela,Kaddafi na Zuma?

Yanditswe kuya 10-09-2016 saa 13:22' na Ntakirutimana Deus


Nyuma y’aho Edem Kodjo wahoze ari Minisitiri w’Intebe wa Togo, ahawe n’Umuryango wa Afurika Yunze Ubumwe kuba umuhuza w’abahanganye muri Repubulika Iharanira Demokarasi ya Congo, haribazwa uruhare azagira mu gukemura ibibazo by’umutekano muke bimaze imyaka isaga 20 muri icyo gihugu, mu gihe byananiye abaperezida bari bazwi nk’ibihangange muri Afurika.

Ibibazo bya Congo Kinshasa si ibya none, kuko mu 1996 Nelson Mandela wayoboye Afurika y’Epfo ndetse ufatwa nka Perezida w’igihangange muri Afurika nawe yagerageje gukemura ibibazo byari muri iki gihugu ariko bikananirana.

Jeune Afrique yaganiriye na Prof Bob Kabamba wigisha muri Kaminuza ya Liège mu Bubiligi akaba n’umuhuzabikorwa w’itsinda rigamije gutera inkunga no kunoza ibijyanye na politiki muri Afurika yo hagati, kuri bibazo bya Congo n’uko byagiye binanirana.

Mu 1996 muri Congo hatangiye intambara yari igamije kubohoza icyo gihugu yahanganishije leta n’imitwe yishyize hamwe (Alliance des forces démocratiques pour la libération du Congo -AFDL). Iyo mitwe yagiye yigarurira igice kinini cya Congo irimo Goma, Bukavu, Kisangani, Lubumbashi n’ahandi.

Mandela abonye ko bikomeye yafashe iya mbere asaba ko yaba umuhuza wa Perezida Mobutu Sese Seko wari urembejwe n’indwara icyo gihe n’abamurwanyaga bari bayobowe na Laurent-Désiré Kabila. Tariki ya 4 Gicurasi 1997 yahurije hamwe izo mpande zombi.

Mandela yashakaga ko Mobutu ava ku butegetsi ariko mu buryo bw’icyubahiro, dore ko ari umwe mu bateye inkunga abagize ishyaka rya Mandela, ANC mu gihe abayobozi baryo batotezwaga, Mandela afungwa igihe n’imburagihe.

Mobutu yanze kuva ku butegetsi maze tariki ya 16 Gicurasi 1997 arastindwa.

Prof Kabamba ati « Mobutu ni umwe mu bayobozi waharaniye politiki yo gufatira ibihano politiki ivangura (apartheid) muri Afurika y’Epfo. Mandela mu kumushimira yateguye kujya muri Congo nyuma yo gufungurwa.Yagiye i Goma yakirwa na Perezida Mobutu mu 1990 ».

Frederick Chiluba umuhuza wakurikiye Mandela

Nubwo Mandela yashatse gutanga umusanzu muri Congo, ntacyo byatanze, kuko Mobutu yahiritswe ku butegetsi arahunga. Nyuma y’aho umwaka umwe Congo yongeye gusubira mu ntambara z’urudaca zatewe n’imitwe irimo RCD( Mouvement de libération du Congo) wa Jean-Pierre Bemba wigaruriye igice cy’Iburasirazuba ndetse n’Amajyaruguru ya Congo.

Icyo gihe iryo shyaka ryari rifashijwe n’ibihugu bitandukanye ryaje kurwanywa n’ingabo zo muri Angola, Zimbabwe, Namibie na Tchad zafashije ingabo za Congo.

Frederick Chiluba wari Perezida wa Zambie yasabwe n’umuryango w’ubukungu muri Afurika y’Amajyepfo (SADC) kuba umuhuza muri icyo kibazo. Yakoze akazi gakomeye ko kwicaza abahanganye basinya amasezerano yo guhagarika intambara, yashyiriweho umukono i Lusaka muri Nyakanga 1999.

Kadhafi umuhuza mu bibazo bya Congo

Col Mouammar Kadhafi wayoboraga Libye nubwo atigaragaje ngo bijye ku karubanda nk’umuhuza mu bibazo bya Congo Kinshasa, ariko yabaye we, kuko yabaye umwe mu baperezida ba Afurika bagize uruhare kugira ingo intambara yari ihanganishije leta ya Congo n’abayirwanyaga mu 1999 ihagarare biciye mu masezerano yasinyiwe mu maso ya Chiluba.

Muri Nzeri 1998, Mouammar Kadhafi yateguye ibiganiro byahuriyemo Leta ya Congo n’abayirwanyaga bahurira i Syrte muri Libye. Nyuma yaho tariki ya 18 Mata 1999, ibihugu byakekwagaho uruhare rwo gushyigikira abarwanyaga leta ya Congo muri iyo ntambara byashyize umukono ku masezerano yo kubihagarika. Ibyasinye ni Uganda, Tchad,Érythrée, Congo Kinshasa na Libye, ndetse ingabo zisaga ibihumbi bibiri za Tchad zemeye gutaha.

Ketumile Masire undi muhuza

Nyuma yuko impande zombi zemeranyijwe guhagarika imirwano, Umuryango w’ubumwe bw’Afurika (UA) wagennye Ketumile Masire wahoze ari perezida wa Botswana nk’ugomba guhuza abari bamaze gusinya mu nzira iganisha ku mahoro arambye tariki ya 15 Ukuboza 1999. Icyo gihe Perezida Laurent-Désiré Kabila yahise atangaza ko atamushaka.

Thabo Mbeki umuhuza wakoze akazi gakomeye

Kabamba avuga nyuma yuko Masire yanzwe na Laurent Desire Kabila, umuhungu we wamusimbuye ubwo yari amaze kuraswa, Joseph Kabila yakomeje kuba umuhuza kugera hagati muri Kamena 2002, ubwo Loni yagenaga Moustapha Niasse wahoze ari Perezida wa Sénégal nk’intumwa idasanzwe yagombaga gufasha abanye-Congo kugabana ubutegetsi mu gihe bari mu nzibacyuho.

Ibyo byaje kugerwaho ubwo Thabo Mbeki wari Perezida wa Afurika y’Epfo wari uhagarariye ayo masezerano yateguye umugambi wo gutuma igihugu gisohoka mu bibazo cyarimo.

Uwo mugambi Kabamba yavuze ko witwaga 1 + 3 bivuga ko Perezida Kabila yagombaga kungirizwa n’abayobozi batatu bakomoka mu mashyaka yari ahanganye nawe. Uwo mugambi waje guhinduka 1 + 4 bisabwe na Leta ya Kabila wo kongeramo na Visi Perezida, akungirizwa n’abo bayobozi bo mu mashyaka atavuga rumwe na Kabila.

Obansanjo na Louis Michel bigiriye kwa Laurent Nkunda

Mu ntangiriro z’Ukuboza 2008, Umunyamabanga mukuru wa Loni Ban Ki-moon, yahaye Olusegun Obasanjo wari Perezida wa Nigeria, inshingano zo guhuza leta ya Congo n’umutwe bari bahanganye wa CNDP (Congrès national pour la défense du people) wayoborwaga na Laurent Nkunda wari waranigaruriye bimwe mu bice by’U Burasirazuba bwa Congo.

Obansanjo yaje guhururira na Nkunda i Rutshuru, umubonano Leta ya Kabila yafashe nko gushaka gufatanya na Nkunda.

Nyuma yaho hagati mu Kuboza 2008, Louis Michel, komiseri mu muryango w’ubumwe bw’ibihugu by’u Burayi ushinzwe iterambere n’ibikorwa byo gufasha usanzwe ari n’inshuti ya Joseph Kabila yagiye kubonana na Laurent Nkunda, ashaka kugabanya amashagaga yari afite.

Urugamba rusigaye ni urwa Kodjo watangiye kwamaganwa

Tariki ya 14 Mutarama 2016 AU yagennye Edem Kodjo nk’ugomba guhuza abanye-Congo mu bibazo barimo byo gutegura amatora ya Perezida wa Repubulika ategerejwe muri Congo.

Kodjo ategerejweho guhuza abahanganye bagategura amatora aciye mu mucyo, azerekana uzayobora Congo nyuma yuko manda za Joseph Kabila zirangira mu mpera z’uyu mwaka.

Nyamara ariko abatavuga rumwe na leta bamaze kumushinja kuyibogamiraho. Ibyo akaba yarabishinjwe n’abagize ihuriro rirwanya Kabila ryiyise Rassemblement riyobowe na Étienne Tshisekedi, umwe mu bakomeje guhangana na Kabila kuva yafata ubutegetsi.

Mu gihe Kodjo yaba atabashije kugeza abahanganye ku ntambwe bifuza, haribazwa undi wazamukurira mu ngata, niba na we atananirwa akavanamo ake karenge.

Nelson Mandela (ibumoso), Col Mouammar Kadhafi wayoboraga Libye na Minisitiri Edem Kodjo, umuhuza mushya mu biganiro by'Abanyecongo

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved