00:00:00 IGIHE NETWORK KN KINYARWANDA EN ENGLISH FR FRANCAIS

RDC: Matata Ponyo ushinjwa kunyereza umutungo wa leta agiye gutangira kuburanishwa

Yanditswe na Muhonzire Sylvine
Kuya 25 Ukwakira 2021 saa 09:33
Yasuwe :
0 0

Augustin Matata Ponyo wahoze ari Minisitiri w’Intebe muri Repubulika Iharanira Demokarasi ya Congo, agiye gutangira kuburanishwa i Kinshasa ku byaha aregwa byo kunyereza arenga miliyoni 8$ yari agenewe gukoreshwa mu mushinga wo gutunganya icyanya cy’ubuhinzi n’inganda.

Uyu mugabo uherutse gukurwaho ubudahangarwa na Sena y’iki gihugu, azagezwa imbere y’urukiko kuri uyu wa 25 Ukwakira 2021, aho biteganyijwe ko ari bwisobanure ku byaha aregwa yakoze akiri umuyobozi.

Matata Ponyo yabaye Minisitiri w’Imari muri RDC kuva mu 2010 kugeza 2012, awuvaho aba Minisitiri w’Intebe mu 2012-2016, nabwo ava kuri uyu mwanya aba Umusenateri.

Umunyamategeko we Antoine Vey ukomoka mu Bufaransa yabwiye Jeune Afrique ko umukiliya we ntaho yigeze yungukira mu mafaranga ashinjwa kunyereza agaragaza ko hari ikibazo cyo guhangana hagati y’abagize sena ndetse n’ubushinjacyaha.

Dosiye iregwamo Matata Ponyo irimo n’abandi basenateri, abadepite n’abandi bayobozi bari mu nzego nkuru z’igihugu, aho bivugwa ko bagize uruhare mu kunyereza miliyoni 205 $ muri 285$ zari zarashowe mu mushinga wo utunganya icyanya cy’ubuhinzi n’inganda cya Bukanga Lonzo mu Ntara ya Bandundu iri mu bilometero 240 uvuye i Kinshasa.

Uyu mugabo wari Minisitiri w’Intebe ashinjwa kandi kunyereza miliyoni 7.9$ zari izo kugura imashini.

Uretse iby’aya mafaranga yanyereje muri uyu mushinga, muri Nyakanga 2021 ubushinjacyaha bwamushinjije kandi kunyereza miliyoni 110$ mu 2011 ubwo yari minisitiri w’imari.

Ubushinjacyaha buvuga ko yasinye ko aya mafaranga asohoka mu isanduku ya leta ngo agenewe abashoramarai 300 b’abanyamaanga bagizweho ingaruka na politiki ya perezida Mobutu Sese Seko ya ‘zaïrianisation’ yo gushyira ibikorwa by’iterambere mu maboko y’abanye-Congo, yatangijwe mu 1973.

Gusa ngo ibi byari amanyanga kuko iperereza ryagaragaje ko aba bantu 300 ntababaho.

Matata Ponyo w’imyaka 57 wishingikirizaga ubudahangarwa ahabwa n’umwanya yari afite muri guverinoma yabukuweho, agiye gutangira kuburanishwa ku Rukiko rw’Ikirenga muri RDC.

Matata Ponyo agiye gutangira kuburanishwa ku byaha aregwa byo kunyereza umutungo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .