RDC: Kivu y’Amajyaruguru na Ituri hagiye kuyoborwa n’abasirikari, abasivile bahagarikwe

Yanditswe na Dufitumukiza Salathiel
Kuya 4 Gicurasi 2021 saa 10:32
Yasuwe :
0 0

Ibiro by’Umukuru w’Igihugu muri Repubulika iharanira Demokarasi ya Congo byategetse ko Intara za Kivu y’Amajyaruguru na Ituri ziyoborwa n’abasirikari n’abapolisi, inzego za gisivile zikaba zikuwe ku buyobozi mu gihe cy’iminsi 30 mu rwego rwo kuhagarura amahoro.

Izo ntara zombi ziherereye mu Burasirazuba bwa RDC zimaze imyaka itari mike zirangwamo umutekano muke utezwa n’imitwe yitwaje intwaro iba mu mashyamba yaho, ibintu byatumye ibihumbi by’abaturage bahasiga ubuzima naho abandi bakava mu byabo.

AFP yatangaje ko kuva ku wa Kane tariki 6 Gicurasi 2021 abayobozi bakuru basanzwe bahayobora bazasimbuzwa abasirikari n’abapolisi mu gihe cy’iminsi 30, bakajya kuhagarura amahoro bahagarika ubwicanyi bukomeje gukorerwa abaturage baho.

Izo ntara kandi zizaba zizitiwe kugira ubutwererane n’ubuhahirane n’utundi duce muri iyo minsi.

Mu ijambo rya Perezida Félix Tshisekedi ryanyujijwe kuri televiziyo ya leta ku wa Mbere w’iki Cyumweru, yavuze ko yumvise “akababaro k’abaturage bacu, kandi ndiyumvisha uburibwe ababyeyi, bashiki bacu n’abakobwa bacu bo muri izo ntara bari gucamo kubera ibikorwa by’ihohoterwa bari gukorerwa.”

Umuvugizi w’ibyo biro, Tharcisse Kasongo Mwena, yemeje iby’ayo makuru avuga ko inzego za gisivile zizaba zisimbujwe kugeza igihe utwo duce tugarukiyemo amahoro.

Yagize ati “Mu guhangana na kiriya kibazo, ubuyobozi bw’Intara ya Kivu y’Amajyaruguru buzasimbuzwa ubw’inzego z’igisirikari cya RDC cyangwa iza polisi.”

Uburasirazuba bwa RDC bumaze imyaka isaga 25 bwarabaye isibaniro ry’imitwe yitwaje intwaro irimo ikomoka mu baturanyi nk’u Burundi,Uganda,u Rwanda n’iy’imbere mu gihugu. Bikekwa ko hari imitwe igera mu 122.

Ni agace karimo umutungo kamere ariko abaturage baho ntibarya kabiri isasu ritabavugiye ku mutwe, iyo mitwe isubiranamo cyangwa ishaka guhangana n’ingabo za leta.

Mu bihe bitandukanye hagiye hategurwa ibikorwa bo kuyihashya harimo n’icyiswe Umoje Wetu mu 2009, ariko ntiyahacika burundu. Perezida Tshisekedi aherutse kuvuga ko iyo mitwe agomba guhangana nayo kugeza umutekano ugarutse muri ako gace.

Intara ya Ituri na Kivu y'Amajyaruguru zigiye kuyoborwa n'igisirikari mu gihe cy'iminsi 30

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .