RDC: Katumbi uri mu buhungiro yagaragaje abo yakorana nabo aramutse abaye perezida

Yanditswe na Mukaneza M.Ange
Kuya 5 Nyakanga 2018 saa 07:59
Yasuwe :
0 0

Nyuma y’amezi ane atangaje gahunda ye irebana no kwiyamamaza kuba Perezida wa Repubulika Iharanira Demokarasi ya Congo, RDC, Moïse Katumbi yashyize ahagaragara urutonde rw’abantu 46 bamufasha kuyobora igihe yaramuka atowe.

Ku itariki ya 2 Nyakanga 2018 nibwo Katumbi umaze imyaka ibiri ari mu buhungiro kubera impamvu za politiki, ndetse akaba yarashyiriweho impapuro zimuta muri yombi aho ashinjwa kwinjiza abacancuro b’abanyamahanga mu gihugu no gutunga ubwenegihugu bw’u Butaliyani kandi bitemewe, yashyize uru rutonde hanze.

Yarushyize hanze nyuma y’umunsi umwe gusa yemeje ko ihuriro rye rya politiki rizahatanira imyanya mu matora y’abayobozi bayobora intara za RDC ateganyijwe ku wa 23 Ukuboza.

Nk’uko bigaragara kuri uru rutonde Jeune Afrique ifitiye kopi, mu bibanze harimo Salomon Idi Kalonda Della ateganya kugira umujyanama we udasanzwe mu birebana na politiki. Uyu mugabo umaze imyaka isaga 20 aziranye na Katumbi ni umwe mu bamugiraga inama ubwo yari Guverineri w’Intara ya Katanga, ndetse banafatanyije mu kuyobora ikipe ya TP Mazembe.

Undi waje kuri uru rutonde ni Olivier Kamitatu uzaba ushinzwe kuyobora abajyanama ba perezida uko ari 46, uyu mugabo usanzwe ari n’umuvugizi wa Katumbi yavuze ko nubwo uyu mubare ari munini, bazawugabanya hagakorwa guverinoma nto.

Kamitatu yavuze ko kandi icyashyizwe imbere ari uburinganire, aho kimwe cya kabiri cy’abajyanama bose ari abagore, bakaba batoranyijwe hakurikijwe ubushobozi bwabo mu byiciro barimo.

Nubwo yashyize hanze abazamufasha kuyobora naramuka atsinze ariko, umugambi wa Katumbi ushobora gukomwa mu nkokora no kuba urubanza rwe rwarongeye kubyutswa ku buryo hari n’impungenge ko naramuka akandagije ibirenge muri RDC ashobora gufungwa.

Mu 2016 kandi urukiko rw’amahoro rwa Kamalondo mu mujyi wa Lubumbashi rwamukatiye adahari gufungwa imyaka itatu, ashinjwa kubohoza no kugurisha inzu y’umugereki Alexandros Stoupis.

Moïse Katumbi w’imyaka 54, kuva mu 2007 yabaye Guverineri w’Intara ya Katanga avaho yeguye mu 2015, akaba amaze imyaka ibiri mu buhungiro.

Urutonde rw'abo Katumbi yifuza gukorana nabo aramutse atowe
Katumbi uri mu buhungiro yagaragaje abo yakorana nawe aramutse abaye perezida

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza