Kwamamaza

RDC: Inyeshyamba zashimuse abashoferi 10 zasabye ibihumbi 40$ ngo barekurwe

Yanditswe kuya 16-09-2016 saa 10:33' na Tombola Felicie


Abarwanyi bacyekwa ko ari abo mu mutwe w’inyeshyamba za Mai Mai basabye amadorali ibihumbi 40 kugira ngo barekure abashoferi 10 bo muri Kenya na Tanzania bashimutiwe i Namoyo mu Ntara ya Kivu y’Amajyepfo muri Repubulika Iharanira Demokarasi ya Congo ku wa Gatatu tariki ya 14 Nzeri 2016.

Umuyobozi ushinzwe itumanaho muri Minisiteri y’Ububanyi n’Amahanga n’Ubutwererane muri Tanzania, Mindi Kasiga yatangarije abanyamakuru mu Murwa Mukuru Dar es Salaam ko abafashwe bugwate bahawe amasaha 24 kugira ngo amafaranga basabye abe yishyuwe ariko ayo masaha yarangiye ejo hashize.

Kasiga yatangaje ko aba barwanyi basaba ko buri wese mu bafashwe bugwate agomba gutangirwa ibihumbi bine by’amadorali ya Amerika ahwanye na miliyoni 8.7 y’Amashilingi kugira ngo arekurwe.

Yagize ati "Guverinoma ya Tanzania yatangiye kuvugana na Repubulika Iharanira Demokarasi ya Congo kugira ngo abo bashoferi barekurwe mu mahoro.”

Yakomeje atangaza ko ku ikubitiro izi nyeshyamba zashimuse abashoferi cumi na babiri ndetse zitwika imodoka enye mu zo bari batwaye. Imodoka umunani zari iz’umunyemari Azim Dewji naho izindi enye zikaba zari iz’abanyakenya .

Babiri muri aba bashoferi bahise batoroka ndetse baza gutangaza aya makuru.

Kasiga atangaza ko abagize uruhare mu gushimuta aba bashoferi ari abarwanyi b’Umutwe wa Mai Mai ukorera mu mashyamba ya Congo.

Ngo abashimuswe berekejwe ahitwa Kaselebele na Matete mu birometero 30 uvuye mu mujyi wa Namoya aho bashimutiwe bavuye muri Barno gushyirayo ibicuruzwa bya sima bari bapakiye.

Ni ku nshuro ya kabiri igikorwa cy’ubushimusi cyongera kuba nyuma y’uko umwaka ushize hari abavugabutumwa umunani b’abayisilamu bakomoka muri Tanzania bafashwe bugwate ariko ku bufatanye bw’ibihugu byombi bakarekurwa ari amahoro.

Kasiga yatangaje ko yizeye ko uburyo bwakoreshejwe mu kurekura aba bayisilamu buzakoreshwa no kuri aba bashoferi.

Yasabye abakorera ubucuruzi mu Ntara ya Kivu kujya babanza kumenya uko umutekano uhagaze mbere yo gukora ingendo.

Umuyobozi w’Ishyirahamwe ry’ubwikorezi bw’ibicuruzwa muri Tanzania yatangarije Daily News ko batangiye kuvugana n’abakora ubucuruzi muri Congo kugira ngo harebwe uko abo bashoferi barekurwa.

Zimwe mu modoka zaratwitswe zirakongoka

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 27 September 2016
Copyright © 2009 -2014 - IGIHE Ltd - All Rights Reserved