RDC: Ingabo za Leta zivuganye abarwanyi bane ba FDLR

Yanditswe na Uwishyaka Jean Louis
Kuya 24 Ukwakira 2016 saa 09:27
Yasuwe : XX
0

Ingabo za Leta ya Congo Kinshasa(FARDC) zishe abarwanyi bane bo mu nyeshyamba z’umutwe wa FDLR, zifatamo babiri bakiri bazima ndetse n’imbunda zabo eshanu.

FARDC yagabye igitero kuri abo barwanyi ku Cyumweru tariki ya 23 Ukwakira 2016, i Rutshuru mu Ntara ya Kivu y’Amajyaruguru.

Igabwa ry’icyo gitero ryakozwe nyuma y’uko izo ngabo zifatiye umusore w’umucuruzi wo muri ako gace,abaturage baho baketseho gukorana na FDLR.

Radio Okapi itangaza ko ingabo za Congo zahise zijya iwe zihasanga umurwanyi wa FDLR.

Uwo mucuruzi yiyemereye ko akorana na FLDR ndetse ko anabacumbikira rimwe na rimwe iyo bari mu bikorwa by’ubutasi muri Rutshuru.

Nyuma yo gufata uwo musore, yajyanywe ku ngufu kwerekana ibirindiro by’izo nyeshyamba, ari nabwo mu kugerayo FARDC yahitaga izigabaho ibitero, maze bigwamo abarwanyi bane ba FDLR, bafatamo babiri abandi babasha gucika barahunga.

Uwo musore wari ucumbukiye abo barwanyi afungiye kuri gereza ya Nyongera, i Kiwanja.

Muri Kamena, izo ngabo zari zasheshe ibirindiro bya FDLR byari ahitwa Kazaroho mu Ntara ya Rutshuru.

Umuvugizi w’ibikorwa bigamije guhiga imitwe ihungabanya umutekano muri Congo,Sokola 2, Capt Njike Kaiko, yatangaje ko ibyo birindiro byasenywe mu bikorwa by’ingabo za Congo zifashijwe n’iza Loni ziri mu butumwa bwo kubungabunga amahoro muri icyo gihugu (MONUSCO).

Umutwe wa FDLR ugizwe n’abashinjwa kugira uruhare muri Jenoside yakorewe Abatutsi mu 1994 mu Rwanda. Uvugwaho guhungabanya umutekano muri Congo, mu bikorwa byo kwica abasivili, gusahura ibyabo n’ibindi.

Ingabo za Congo zihora zikozanyaho n'abarwanyi ba FDLR mu bitero bitandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza