00:00:00 IGIHE NETWORK KN KINYARWANDA EN ENGLISH FR FRANCAIS

RDC: Ingabo za Kenya zageze i Beni

Yanditswe na Bukuru JC
Kuya 10 Kanama 2021 saa 05:56
Yasuwe :
0 0

Ingabo za Kenya ziri mu zigomba kuba zigize izizajya mu bikorwa byo kurwanya imitwe yitwaje intwaro yayogoje Uburasirazuba bwa Repubulika Iharanira Demokarasi ya Congo (Brigade d’intervention des Nations unies), zageze i Beni kuri uyu wa Mbere, tariki ya 9 Kanama 2021.

Iri ni itsinda rya kabiri rigeze muri Kivu y’Amajyaruguru nyuma y’irya Tanzania ryahageze mu mezi ashize.

Uretse Kenya na Tanzania, ibindi bihugu bigomba gutanga ingabo muri iyi gahunda birimo Afurika y’Epfo na Nepal. Biteganyijwe ko ingabo z’ibi bihugu bibiri zizahagera mu minsi mike.

Muri Mata 2021, Perezida wa Repubulika Iharanira Demokarasi ya Congo, Félix Tshisekedi, yari yatangaje ko Ingabo za Kenya zitegerejwe ku butaka bw’iki gihugu, gufasha ingabo za FARDC mu rugamba rwo gutsintsura imitwe y’iterabwoba n’indi ikorera mu Burasirazuba bwa Congo.

Yabigarutseho mu kiganiro n’abanyamakuru ubwo yari kumwe na Uhuru Kenyatta, Perezida wa Kenya.

Icyo gihe yagize ati “Mu minsi mike, Ingabo za Kenya zizagera ku butaka bwa Repubulika Iharanira Demokarasi ya Congo gufasha izacu gushaka uburyo buboneye bwo kurwanya iterabwoba n’amakimbirane arangwa mu Burasirazuba bw’igihugu.”

Izi ngabo zigenwa n’Umuryango w’Abibumbye (United Nations Force Intervention Brigade (FIB) ni zimwe mu zigize Misiyo ya Loni yo kugarura amahoro muri Congo (MONUSCO).

Zemejwe n’Akanama ka Loni gashinzwe Amahoro muri Werurwe 2013, icyo gihe icyari kigamijwe ni ukwambura intwaro Umutwe wa M23 n’indi mitwe ikomoka mu bihugu by’amahanga.

Kuva Kivu y’Amajyaruguru ishyizwe mu bihe bidasanzwe uhereye muri Gicurasi uyu mwaka, abarwanyi bagera kuri 600 bo mu mitwe yitwaje intwaro yari ihafite ibirindiro yishyikirije ingazo za Leta, FARDC nyuma y’ibikorwa byo kuyihashya byakozwe muri icyo gihe.

Ingabo za Kenya zageze muri RDC mu butumwa bwa Loni bugambiriye gufasha FARDC gutsintsura imitwe y'iterabwoba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .