RDC: Imyigaragambyo idasanzwe yahitanye 17 barimo abapolisi batatu

Yanditswe na Ishimwe Israel
Kuya 20 Nzeri 2016 saa 07:20
Yasuwe : XX
0

Imyigaragambyo idasanzwe i Kinshasa yaguyemo abantu 17 barimo abapolisi batatu, abagera kuri 14 bakomeretswa n’amasasu ubwo inzego z’umutekano zageragezaga guhangana n’abayoboke b’amashyaka atavuga rumwe n’ubutegetsi bigabizaga imihanda bahamagarira Leta ya Congo kubahiriza igihe cy’amatora giteganywa mu Itegeko Nshinga.

Jeune Afrique dukesha iyi nkuru yatangaje ko iyo mibare y’agateganyo yatangajwe na Minisitiri w’Umutekano, Évariste Boshab Mabudj-ma-Bilenge ndetse ishimangirwa n’Umuvugizi wa Leta ya Congo, Lambert Mende, wanavuze ko hangiritse byinshi.

Lambert Mende yakomeje avuga ko ibiro by’amashyaka avuga rumwe n’ubutegetsi byatwitswe n’amabanki arasahurwa. Ubwo hatwikwaga icyicaro cy’ihuriro ry’urubyiruko PPRD, ni na bwo abapolisi babiri mu bari batabaye bahise bahasiga ubuzima.

Abahagarariye amashyaka atavuga rumwe n’ubutegetsi kimwe n’imiryango ya sosiyete sivile yatangaje ko hapfuye benshi abandi bagafungwa.

Imvururu zatangiriye i Limete mu gace gaherereyemo icyicaro cy’ishyaka ritavuga rumwe n’ubutegetsi, UDPS rya Etienne Tschisekedi, ubwo urubyiruko rwitwaje amabuye rwahanganaga n’abapolisi bari baje kubabuza gutangira imyigaragambyo mu rukerera rw’uyu wa Mbere.

Uru rubyiruko rwumvikanye n’amajwi arenga bavuga bati "Kabila agomba kugenda".

Umunyamakuru wa RFI i Kinshasa wari kumwe na gafotozi w’Ibiro Ntaramakuru by’Abafaransa, AFP bari bafatiwe mu kivunge cy’abigaragambya, ariko Umuvugizi wa Leta ya Congo ahita ategeka ko barekurwa vuba na bwangu.

Uretse i Kinshasa, henshi mu gihugu habaye imyigaragambyo, yanakomerekeyemo umuntu umwe i Beni, abandi 11 barimo abayoboke b’amashyaka n’abandi bo mu miryango itari iya Leta barafatwa barafungwa i Kisangani.

Ibi byabaye ku munsi u Bufaransa bwasohoyeho itangazo bwamagana kuba Leta ya Congo itarimo gutegura amatora ngo abere igihe yari ateganyijwe, ari na bwo bwaboneyeho gusaba ko yategurwa hakirindwa ko yatinzwa cyane.

Kuri uyu wa mbere byari biteganyijwe ko haba ibiganiro hagati ya Leta n’abatavuga rumwe nayo byagombaga kunyura kuri Televiziyo y’Igihugu ariko kubera imyigaragambyo byahise byimurirwa kuri uyu wa Kabiri.

Abatavuga rumwe na Leta ya Congo bazindutse mu mihanda bigaragambya basaba ko Kabila arekura ubutegetsi
Abigaragambya bangije ibikorwa remezo byinshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza