Kwamamaza

RDC: Ikibazo cy’ingengabihe y’amatora kigiye kwigwaho byihariye

Yanditswe kuya 19-09-2016 saa 09:45' na Mukaneza M.Ange


Mu gihe ibiganiro by’amahoro muri Repubulika Iharanira Demokarasi ya Congo (RDC) bihuje Leta n’abatavuga rumwe nayo bikomeje, kuri uyu wa Mbere haribandwa ku kibazo cy’ingengabihe y’amatora.

Ibi biganiro byatangiye ku itariki ya 1 Nzeri 2016, byagombaga gusozwa ku wa Gatandatu w’icyumweru gishize ariko bemeza ko bikomeza kuri uyu wa Mbere kuko ikibazo cy’ingengabihe y’amatora idakomeje kuvugwaho rumwe kitarabonerwa umuti.

Nubwo ariko ibiganiro biri bukomeze, uruhande rw’abanze kubyitabira barimo ihuriro ry’amashyaka atavuga rumwe na leta, sosiyete sivile n’indi miryango iharanira uburenganzira bw’abaturage yateguye imyigaragambyo.

Uru ruhande ruvuga ko mu gihe habura umunsi umwe ngo itariki ntarengwa yo gutangaza ingengabihe y’amatora ya perezida igere, bateganya guha Perezida Joseph Kabila amezi atatu yo kumwihanangiriza babinyujije mu myigaragambyo.

Ingengabihe yari yashyizwe ahagaragara na Komisiyo y’amatora yagaragaza ko Perezida, abagize Inteko Ishinga Amategeko n’abayobozi b’inzego z’ibanze bazatorwa mu mpera za 2018. Bivuze ko igihugu kizamara imyaka ibiri mu nzibacyuho.

Ibi ariko byamaganiwe kure n’abatavuga rumwe na leta n’inama nkuru y’Abepisikopi(Cenco).

Ibiganiro mpaka by’uyu munsi bikaba biri buce kuri televiziyo kugira ngo abaturage babashe gusobanukirwa neza uko iki kibazo giteye.

Umwe mu nararibonye za Cenco yabwiye Radio Mpuzamahanga y’Abafaransa, RFI ko bigishoboka kwigiza imbere itariki y’amatora, kugabanya umubare w’ibiro by’itora ndetse n’iminsi yo gutora ikaba ibiri.

Ku rundi ruhande ariko ihuriro ry’abashyigikiye Perezida Kabila, rishinja intumwa idasanzwe ya Leta Zunze Ubumwe za Amerika mu biyaga bigari, Tom Perriello gukora ibishoboka kugira ngo ibi biganiro by’amahoro ntibigere ku ntego zabyo.

Ibi iri huriro ribishingira ku kuba Perriello ari gukusanya miliyoni 50 z’amadorali yo kugura ibikoresho byifashishwa mu matora kugira ngo arebe ko byibura yaba mu 2017.

Itegeko Nshinga RDC igenderaho riteganya ko amatora ya Perezida yagakwiye kuba ku itariki 27 Ugushyingo, ni mu gihe manda ya Kabila ari nayo ya nyuma izarangira kuwa 20 Ukuboza 2016.

Abatavuga rumwe n'ubutegetsi bavuga ko Perezida Kabila ashaka kwiharira ubutegetsi

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 31 Ukwakira 2016
Copyright © 2009 -2014 - IGIHE Ltd - All Rights Reserved