RDC: General Numbi wari inkoramutima ya Kabila birakekwa ko yahunze igihugu

Yanditswe na Muhonzire Sylvine
Kuya 21 Werurwe 2021 saa 06:47
Yasuwe :
0 0

Umusirikare ukomeye muri Repubulika Iharanira Demokarasi ya Congo, General John Numbi Tambo ushinjwa kuba inyuma y’ubwicanyi bwakorewe Floribert Chebeya wari impirimbanyi y’uburenganzira bwa muntu n’umushoferi we Fidèle Bazana, amaze iminsi atagaragara mu ruhame nyuma y’uko RDC yokejwe igitutu cyo kumuta muri yombi.

RFI ivuga ko aba bagabo babanye-Congo bishwe tariki 1 Kamena 2010, ubwo Chebeya yari afite gahunda yo kubonana na John Numbi wari umuyobozi mukuru wa Polisi, akicwa n’agatsiko k’abapolisi barindwi ubwo yari mu nzira ajya kumureba.

Nyuma y’urupfu rwa Chebeya wari umuyobozi w’umuryango Voix des sans voix (Ijwi ry’Abatagira kivugira), abapolisi bagize uruhare mu rupfu rwe barafunzwe abandi barahunga, gusa umuyobozi wabo John Numbi akomeza kwidegembya. Mu 2018 yagizwe Umugenzuzi Mukuru mu gisirikare cya Congo, umwanya yakuweho muri Nyakanga umwaka ushize.

Ku Buyobozi bwa Joseph Kabila byari bigoye ko General Numbi yatabwa muri yombi ngo aryozwe ibyaha yakoze, ariko ku ngoma ya Félix Tshisekedi muri uyu mwaka abo mu muryango w’abishwe bubuye ikirego basaba ko yakurikiranwa n’ubutabera.

Nyuma y’uko RDC ikomeje kotswa igitutu cyo kumuta muri yombi, General Numbi ntaheruka kugaragara mu ruhame ndetse bikekwa ko yaba yarahunze igihugu, agahungira muri Zimbabwe. Aheruka kugaragara mu mashusho yashyize ku mbuga nkorayambaga yigisha umwe mu bakobwa be uko bakoresha intwaro.

Kuva Chebeya yakwicwa uyu musirikare yahakanye ibirego aregwa avuga ko ari umwere, gusa ubu ari kuregwa n’abapolisi bagize uruhare mu iyicwa rya Chebeya.

General Numbi biravugwa ko yaba yahungiye muri Zambia (Ifoto: AFP)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .