Kwamamaza

RDC: Amadolari 5000 yatumye imiryango itatu irwanira umurambo

Yanditswe kuya 28-09-2016 saa 20:56' na Philbert Hagengimana


Leta ya Congo iritegura gutanga amadolari ya Amerika 5000 nk’impozamarira kuri buri wese mu baguye mu mvururu zo kuwa 19-20 Nzeri uyu mwaka, igikorwa cyo kubarura abapfuye kikaba cyagaragayemo uburiganya ndetse bigeza aho imiryango itatu irwanira umurambo.

Kuwa mbere tariki ya 19 Nzeri uyu mwaka, ni bwo i Kinshasa hadutse imvururu, nyuma y’aho urubyiruko rw’amashyaka atavuga rumwe n’ubutegetsi ruhanganye n’inzego z’umutekano zarimo ziburizamo imyigaragambyo.

Iyo myigaragambyo yari yeteguwe hagamijwe guha integuza Perezida Kabila, ko habura amezi atatu (3) n’umunsi umwe ngo arekure ubutegetsi, dore ko Itegeko Nshinga riteganya ko manda ye igomba kurangira ku wa 19 Ukuboza.

Polisi ya RDC yatangaje ko izo mvururu zahitanye abantu 32, mu gihe uruhande rw’abatavuga rumwe n’ubutegetsi rwavugaga ko hapfuye abagera ku 100 abandi 1000 bagakomereka.

Radiyo mpuzamahanga y’Abafaransa RFI dukesha iyi nkuru, itangaza ko Guverineri w’Umujyi wa Kinshasa, André Kimbuta Yango, yasabye ko hatangwa ubufasha bw’amadolari 5000 kuri buri muryango ufite uwaguye muri izo mvururu.

Ni muri urwo rwego hakomeje igikorwa cyo kubarura abaguye muri izo mvururu, kikaba kigenzurwa na Minisitiri w’Intara ya Kinshasa ushinzwe ubuzima n’imibereho myiza y’abaturage.

Icyo gikorwa cyanagaragayemo uburinganya, aho imiryango itatu yarwaniye umurambo, bamwe bamwita uwabo abandi uwabo.

André Kimbuta Yango yakomeje asaba UDPS, ishyaka rirangaje imbere andi yose atavuga rumwe n’ubutegetsi ko ritakwigaragambiriza icyo gikorwa.

Ishyaka UDPS ari na ryo ryari ryateguye iyo myigaragambyo yaje kubyara imvururu, isaba ko Leta ya Congo yakora ibishoboka byose igategura amatora mu gihe cyagenwe n’Itegeko Nshinga, mu gihe Komisiyo y’Amatora yo yamaze gutangaza ko bidashoboka mbere ya Nyakanga 2017.

Umunyamabanga mukuru wa UDPS, Jean-Marc Kabund-a Kabund yatangaje ko ubutegetsi bwishe abigaragambirizaga Demukarasi, bukwiye kuba bugira ikindi bukora kirenze guha ubufasha imiryango y’abaguye muri izo mvururu.

Ati “Uyu munsi, Guverinoma yari ikwiye kunamira bariya bapfuye, kuko bapfuye barimo guharanira Demukarasi, bategeka ko amatora yategurwa mu gihe cyagenwe n’Itegeko Nshinga. Icyiza cyo gukora ni ukubahiriza Itegeko Nshinga no gutegura amatora ku gihe.”

Iryo shyaka rikomeza rivuga ko umubare w’abahitanywe n’izo mvururu ukwiye kwiyongera, hagashyirwaho n’abaguye mu bitaro bari bagiye kuvurirwamo.

Abaturage bo muri RDC ubwo bari mu myigaragambyo

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved