RDC: Abaturage 54 bamaze kwicirwa mu bitero by’Inyeshyamba za ADF

Yanditswe na IGIHE
Kuya 19 Ugushyingo 2019 saa 10:58
Yasuwe :
0 0

Abaturage batandatu biciwe mu Burasirazuba bwa Repubulika Iharanira Demokarasi ya Congo, mu ijoro ryo ku Cyumweru rishyira ku wa Mbere mu gitero bikekwa ko cyagabwe n’Inyeshyamba za ADF.

ADF yakajije ibikorwa by’ubwicanyi bwibasira abasivili nyuma y’igitutu yatangiye kotswa na FARDC cyo gutsintsura imitwe yitwaje intwaro ikorera mu mashyamba ya RDC kuva mu ntangiriro z’Ugushyingo 2019.

JeuneAfrique yanditse ko amakuru ikesha inzego z’ibanze ari uko Inyeshyamba za ADF zimaze kwica abaturage 54, kuva ingabo za RDC zatangaza ko zitangiye kugaba ibitero ku birindiro byazo biri mu gace ka Beni ku wa 30 Ukwakira 2019.

Igitero giheruka cyagabwe mu Mujyi wa Oicha uri mu bikometero 30 uvuye mu Mujyi wa Beni mu ijoro ryo ku wa 17 Ugushyingo 2019.

Sosiyete Sivile muri Beni yatangaje ko hari inzu z’abaturage zatwitswe mu bitero byagabwe kuva ku wa 12 Ugushyingo 2019. Yasabye ko hakorwa iperereza ku ruhare rw’igisirikare mu gihe cy’ibitero.

Ingabo nyinshi za RDC zoherejwe muri ako gace mu kurushaho gukaza umutekano w’abahatuye.

Mu gihe ingabo za Leta ya RDC zikomeje kugaba ibitero byo kurandura Umutwe w’Inyeshyamba wa ADF, abarwanyi bawo na bo bagiye mu baturage barabica.

Umudepite Beni mu Nteko, Paul Mohindo, yatangaje ko habarurwa abaturage 50 bishwe n’abarwanyi ba ADF mu minsi irindwi ishize ku buryo hakeneye kugira igikorwa.

Ingabo za Leta zimaze ibyumweru zirwana na ADF zivuga ko aba barwanyi bari gukora ubwicanyi nko kwihorera no kwangisha abaturage igisirikare.

Igisirikare cyanditse ku rubuga rwa Twitter ko “Ni uburyo bushaje bw’umwanzi, buri gihe iyo asumbirijwe agaba ibitero byo kwihorera ku baturage kugira ngo yanduze isura y’ingabo kandi ntibazifashe.’’

Inyeshyamba za ADF zirwanya ubutegetsi bwa Uganda zimaze imyaka irenga 20 zikorera muri ako gace bihana imbibi.

FARDC iri mu bitero bigamije kurandura imitwe yitwaje intwaro ikorera mu Burasirazuba bwa RDC aho yahereye ku Mutwe wa ADF mu gikorwa cyiswe ’Sukola 1 Grand-Nord’.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza