RDC: Abarwanya Kabila bamaganye ibyo kwimurira amatora mu 2019

Yanditswe na Herve Ugirumukunda
Kuya 13 Ukwakira 2017 saa 07:41
Yasuwe :
1 0

Umuyobozi w’abatavuga rumwe na Leta muri Repubulika Iharanira Demokarasi ya Congo, Felix Tshisekedi, yatangaje ko kuba Komisiyo y’Amatora yimuriye amatora nyuma ya Mata 2019 ari ikimenyetso simusiga cy’intambara Perezida Joseph Kabila yashoje ku baturage.

Mu nama yahuje abarwanya Leta ya Kabila bibumbiye mu cyiswe “Rassemblement” Felix Tshisekedi, yashimangiye ko Perezida wa Komisiyo y’Amatora, Corneille Nangaa ari igikoresho cya Kabila.

Ati “Kuri iyi nshuro, Joseph Kabila ni umukozi we Corneille Nangaa batangije intambara ku baturage ba Congo, biyerekana ko badashoboye.”

Muri iki cyumweru Komisiyo y’Igihugu y’Amatora ya Congo, CENI, yatangaje ko ikeneye iminsi 504 kugira ngo itegure amatora.

Ni umwanzuro unyuranyije n’amasezerano yabaye hagati ya Perezida Joseph Kabila n’abo batavuga rumwe avuga ko amatora azaba mbere y’isozwa ry’uyu mwaka.
Amatora yagombaga kuba mu Ugushyingo kwa 2016 ariko CENI ivuga ko bidashoboka kubera ubushobozi buke.

Kwimurira amatora muri 2019 bizatuma Perezida Joseph Kabila akomeza kuyobora Congo kandi manda ye yararangiye.

Urubuga 7sur7 ruvuga ko Felix Tshisekedi n’abo bafatanyije basabye Loni kugira icyo ikora, igashyira igitutu kuri CENI na Kabila kugira ngo hajyeho inzibacyuho.

Ati “Twatangiye ibiganiro n’Umuryango Mpuzamahanga binyuze muri Loni kugira ngo igire uruhare ruziguye mu bibera muri Congo, ishyireho inzibacyuho, CENI ivugururwe na Kabila abe asimbuwe.”

Ejo hashize, uhagarariye Loni muri Repubulika Iharanira Demokarasi ya Congo, Maman Sidikou, yabwiye Akanama k’Umutekano ka Loni ko bikiri ngombwa ko amatora aba mbere y’isozwa rya 2017.

Gusa avuga ko bigikomeye kuko “Kuri ubu gushyiraho ingengabihe y’amatora, ingengo y’imari yayo no kubahiriza uburenganzira bwa muntu bikiri ingorabahizi.”

Joseph Kabila yayoboye Congo kuva mu 2001 nyuma y’urupfu rwa se, Laurent Desire Kabila. Yaje gutorerwa kuba Perezida mu 2006, atorerwa manda ya kabiri mu 2011.

Amatora yo gushaka umusimbura yagombaga kuba ku ya 29 Ugushyingo 2016, ariko Komisiyo y’Amatora itangaza ko atazashoboka mbere ya 2018 kuko umubare w’abazayitabira utari wamenyekanye.

Kabila azakomeza kuyobora Congo kugeza igihe amatora azabera
Tshisekedi yatangaje ko Kabila yashoje intambara ku baturage ba RDC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza