RDC: Abapolisi barenga 500 bagiye kwifashishwa mu kurinda abakandida mu matora ya perezida

Yanditswe na Bukuru JC
Kuya 20 Ukwakira 2018 saa 08:58
Yasuwe :
0 0

Abapolisi 525 batoranyirijwe kurinda abakandida 21 bazahatana mu matora y’Umukuru w’Igihugu mu Ukuboza 2018, muri Repubulika Iharanira Demokarasi ya Congo.

Umuvugizi wa Polisi ya Congo, Col. Pierrot Mwana Mputu, yatangaje ko muri Polisi y’igihugu, umutwe ushinzwe kurinda inzego za leta n’abayobozi bakuru uri kwiga uko wakuzuza inshingano zo kurinda abakandida, nk’uko Radio Okapi yabitangaje.

Ati “Uyu munsi, abapolisi 525 bagiye gushingwa abakandida 21 bamaze gutoranywa, bashyirwa mu mutwe wo kurinda inzego za let n’abayobozi bakuru.”

Yakomeje avuga ko abo bapolisi barashyirirwaho amabwiriza kubera ko hari abakandida bari bafite abapolsi bafite amasasu n’intwaro z’intambara.

Col. Mwana Mputu yashimangiye ko n’abo bapolisi basanganywe hashyirwaho uburyo butuma bagendera ku mabwiriza y’abashyiriweho kurinda abakandida.

Muri Nzeri, Komisiyo y’Amatora muri Congo Kinshasa, yemeje abakandida 21 bazahatanira gusimbura Perezida Joseph Kabila wasoje manda ze ebyiri yemererwa n’Itegeko Nshinga.

Ihuriro ry’amashyaka ririmo irya Kabila, ryatanze umukandida Emmanuel Ramazani Shadary wahoze ari Minisitiri w’Intebe wungirije akaba na Minisitiri w’Umutekano w’imbere mu gihugu kuva ku wa 19 Ukuboza 2016 kugeza ku wa 22 Gashyantare 2018.

Nyuma y’aho Jean Pierre Bemba na Moïse Katumbi batemerewe kwiyamaza, hasigaye Félix Tshisekedi w’ishyaka UDPS mu bazwi batanzwe n’amashyaka atavuga rumwe na leta ku gusimbura Perezida Kabila.

Amatora y’Umukuru w’igihugu ateganyijwe ku wa 23 Ukuboza 2018.

Umuvugizi wa Polisi ya RDC, Pierrot Mwana Mputu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza