Raila Odinga yikuye mu matora ya Perezida wa Repubulika

Yanditswe na IGIHE
Kuya 10 Ukwakira 2017 saa 04:27
Yasuwe :
0 3

Raila Odinga wari uhagarariye amashyaka atavuga rumwe n’ubutegetsi muri Kenya, Nasa, yikuye mu matora y’Umukuru w’Igihugu yagombaga kuzasubirwamo ku wa 26 Ukwakira 2017.

Kuri uyu wa Kabiri, Odinga yatangaje ko we n’uwo biyamamazanya hamwe, Kalonzo Musyoka, batazitabira isubirwamo ry’amatora y’Umukuru w’Igihugu.

Odinga yavuze ko Nasa yakomeje gusaba ko amatora y’Umukuru w’Igihugu yazaba mu mucyo akubahiriza ibiteganywa n’Itegeko Nshinga ariko ko nta cyizere ko bizakorwa.

Ati “Twabonye ko nta bushake bugaragara ku ruhande rwa IEBC [Komisiyo yigenga ishinzwe amatora] bukumira uburiganya mu matora nkuko byagaragaye mbere.”

Yashinje IEBC (Independent Electoral and Boundaries Commission) kuba nta mpinduka igaragaza zazatuma amatora aba mu mucyo.

Urukiko rw’Ikirenga muri Kenya ni rwo rwatesheje agaciro ibyavuye mu matora y’umukuru w’igihugu yabaye ku itariki 8 Kanama uyu mwaka bitewe n’ibibazo byayagaragayemo, rutegeka ko asubirwamo, aho iki gikorwa cyari giteganyijwe ku wa 26 Ukwakira uyu mwaka.

Perezida w’Urukiko rw’Ikirenga David Maraga yatangaje ko Komisiyo y’Amatora,IEBC itayoboye amatora mu buryo buteganywa n’Itegeko Nshinga.

Yagize ati “ Amatora ntabwo ari igikorwa cy’umunsi ni urugendo. Nyuma yo gusuzuma ibimenyetso byose tunyuzwe no kuvuga ko amatora atakozwe mu buryo buteganywa n’Itegeko Nshinga n’andi mabwiriza.”

Uhuru Kenyatta yamaganye icyemezo cy’urukiko

Nyuma y’uko Urukoko rw’Ikirenga rufashe uwo mwanzuro, Perezida Kenyatta yahamagariye abaturage kugira ituze n’amahoro. Yagize ati “ Mufatane ikiganza na bashiki banyu na basaza banyu mubwirane muti ‘Amahoro’.Umuturanyi wawe azakomeza abe umuturanyi wawe... hatitawe ku mutwe wa politiki uwo ari wo wose yaba arimo."

Yongeyeho ati “ Njyewe ubwanjye namaganye ibyategetswe ariko ndabyubaha; ndabyamaganye kuko miliyoni z’Abanyakenya...bakoze amahitamo yabo none abantu batandatu biyemeje gukora ibihabanye n’ugushaka kw’abaturage.”


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza