PLO Lumumba yangiwe kwinjira muri Zambia

Yanditswe na Mukaneza M.Ange
Kuya 30 Nzeri 2018 saa 12:17
Yasuwe :
0 0

Umunyamategeko wo muri Kenya, Patrick Lock Otieno Lumumba yabujijwe kwinjira muri Zambia aho yari agiye gutanga ikiganiro muri Kaminuza ku mubano wa Afurika n’u Bushinwa.

Kuri iki Cyumweru nibwo PLO Lumumba, usanzwe ari Umuyobozi w’Ishuri ryigisha amategeko rya Kenya yagomba gutanga ikiganiro muri Eden University.

Akigera ku kibuga cy’indege cya Kenneth Kaunda mu mujyi wa Lusaka, Lumumba yangiwe gukomeza urugendo yari agiyemo, ahubwo asubizwa muri Kenya.

Abinyujije kuri Twitter, Minisitiri ushinzwe itangazamakuru muri Zambia, Dora Siliya yavuze ko guverinoma ibinyujije ku Biro bishinzwe Abinjira n’Abasohoka yabujije Lumumba kwinjira muri iki gihugu kubera ibibazo by’umutekano.

Ati “Ibiro bishinzwe abinjira n’abasohoka ni urwego rw’umutekano rukorana n’izindi nzego haba mu gihugu imbere no hanze ya Zambia.”

The EastAfrican ivuga ko Lumumba yari yateguye iki kiganiro mu gihe hakomeje kumvikana amajwi y’abashinja u Bushinwa gushaka kwigarurira Afurika, binyuze mu nguzanyo zitwa ko zihendutse.

Zambia ni kimwe mu bihugu bigaragaramo ibikorwa byinshi by’Abashinwa, aho usanga aribo bafite amasoko menshi yo kubaka ibikorwaremezo birimo ibibuga by’indege, imihanda, inganda n’izindi nyubako nini.

Ni mu gihe nyamara Zambia ifitiye ibihugu birimo n’u Bushinwa ideni rigera kuri miliyari 10.6 z’amadolari.

Iki gihugu gikekwaho kuba hari amadeni kigenda gihisha, nk’uko byagenze kuri Mozambique yatahuwe mu 2016 ko yahishe ideni rya miliyari ebyiri z’amadolari.

Kubera gutinya ko Zambia yaba nka Mozambique, Ikigega Mpuzamahanga cy’Imari, IMF cyagiye biguru ntege mu biganiro byo guha iki gihugu inguzanyo ya miliyari 1.3 y’amadolari.

Minisiteri y’Imari ya Zambia yemeza ko mu gihembwe cya mbere cya 2018, bishyuye inguzanyo ya miliyoni 342, agizwe na 30% y’u Bushinwa.

Abatavuga rumwe na Leta bo ariko bashimangira ko amadeni Zambia ifitiye u Bushinwa ashobora kubera umutwaro iki gihugu.

Umunyamategeko wo muri Kenya, Patrick Lock Otieno Lumumba yabujijwe kwinjira muri Zambia

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza