Pistorius yimuriwe mu yindi gereza imufasha kugororoka

Yanditswe na Philbert Girinema
Kuya 15 Ugushyingo 2016 saa 02:29
Yasuwe :
0 0

Umunyafurika y’Epfo, Oscar Pistorius, wabaye umukinnyi rurangiranwa mu gusiganwa ku maguru mu cyiciro cy’abafite ubumuga; yimuriwe mu yindi gereza kugira ngo agororwe uko bikwiye.

Pistorius yari afungiye muri Gereza ya Kgosi Mampuru mu Mujyi wa Pretoria azira kwica arashe uwari umukunzi we Reeva Steenkamp ku munsi w’abakundana mu 2013.

Umuvugizi w’ishami rishinzwe serivisi zo kugorora muri gereza Pistorius yari afungiyemo, Manelisi Wolela, yavuze ko yimuriwe muri gereza ya Atteridgeville iri mu Burengerazuba bwa Pretoria.

Yagize ati “Ikibazo ni ibijyanye no kubona porogaramu zimufasha kugororoka. Aho yari afungiye ni iby’agateganyo nta porogaramu zo kugorora hafite kuko buri wese aba ashobora kuba umwere bigatuma hadashyirwa izo gahunda zo kugorora.”

Pistorius aherutse kugira imvune ajyanwa kuvurizwa mu bitaro byigenga nyuma agarurwa muri gereza.

Gereza ya Kgosi Mampuru mu Mujyi wa Pretoria niyo Pistorius yari afungiyemo

Ku itariki 6 Nyakanga 2016 nibwo Pistorius yakatiwe igihano cy’imyaka itandatu azira kwica uwari umukunzi we Reeva Steenkamp.

Muri 2014 yari yakatiwe gufungwa imyaka itanu nyuma yo guhamwa n’icyaha cy’ubwicanyi ariko atabigambiriye. Abunganira umuryango wa nyakwigendera, bahise bajuririra iki gihano bavuga ko Pistorius akwiye guhamywa icyaha cy’ubwicanyi ndetse agakatirwa igifungo cy’imyaka 15 gusa ubucamanza bwaje gutegeka ko afungwa itandatu.

Pistorius we yakunze kwiregura avuga ko yishe Reeva atabigambiriye ahubwo ko yamwitiranyije n’umugizi wa nabi umwinjiranye mu nzu.

Mu minsi ya mbere y'urubanza, Oscar yananirwaga kwakira kumva ko yishe uwo yakundaga
Oscar Pistorius (ibumoso) n'umuvandimwe we Carl Pistorius (iburyo) agerageza kumukomeza umutima mu minsi ya mbere y'urubanza
Pistorius yaterwaga ishema no kuvugira mu ruhame ko akunda Reeva Steenkamp
Reeva Steenkamp na Pistorius bahoze ari inshuti
Pistorius ahabwa igihembo mu irushanwa ryo kwiruka mu mwaka wa 2012
Pistorius yamamaye mu gusiganwa mu cyiciro cy'abafite ubumuga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza