Perezida Hollande arashinja Leta ya Congo ubushotoranyi mu mvururu zahitanye benshi

Yanditswe na Ishimwe Israel
Kuya 22 Nzeri 2016 saa 07:55
Yasuwe : XX
0

Perezida w’u Bufaransa, François Hollande, arashinja Congo Kinshasa, ubushotoranyi bwateje imvururu zashyamiranyije leta n’abatavuga rumwe zabaye mu minsi ibiri ya mbere y’iki cyumweru zigahitana abatari bake.

Jeune Afrique dukesha iyi nkuru, itangaza ko aho yari ari i New York muri Leta Zunze Ubumwe za Amerika mu Nteko rusange y’Umuryango w’Abibumbye, Perezida François Hollande, yavuze ko ibyabaye muri Repubulika Iharanira Demokarasi ya Congo bidakwiye kwihanganira.

Yaboneyeho kuvuga ko Leta ya Congo ari yo ubwayo yateje izo mvururu, anamagana itwikwa ry’ibiro by’amashyaka atavuga rumwe n’ubutegetsi.

Yagize ati “Nta gihugu na kimwe cyakwemerwamo imyitwarire nk’iriya, n’ibyayikurikiye. Mbese ndabyamaganye.”

Perezida Hollande yaboneyeho kwibutsa ko ubwo yari mu ruzinduko i Kinshasa mu 2012, yabwiye Perezida Kabila ko batari buganire ku matora, igihe azabera n’uburyo azakorwamo ashimangira ko bigomba kugenwa n’Itegeko Nshinga.

Ati “Itegeko Nshinga rigomba kubahirizwa, amatora akaba. Rero hamwe n’ubugenzuzi ku rwego mpuzamahanga, tuzareba igishobora gukorwa.”

Abinyujije mu mashusho kuri Youtube kuri uyu wa kuwa Kabiri tariki ya 20 Nzeri, Depite Cécile Kyenge ukomoka muri RDC ariko akaba ahagarariye u Butaliyani mu Nteko Ishinga Amategeko y’Umuryango w’Ubumwe bw’u Burayi, yagize ati “Namaganye nivuye inyuma ziriya mvururu. Nterwa ishema no kubona abanye-Congo bahaguruka bagaharanira uburenganzira bwabo.”

Umutuzo wongeye kugaruka mu Mujyi wa Kinshasa

Kuva kuri uyu wa Gatatu tariki ya 21 Nzeri, Umujyi wa Kinshasa uratuje ariko benshi baracyashidikanya niba atari iby’igihe gito.

Mu bice by’Uburengerazuba n’Amajyepfo ya Kinshasa, ubuzima bwongeye gukomeza, ingendo zasubukuwe, sitasiyo za lisansi na zo zirakora ndetse n’amaduka yongera gufungura, mu gihe ababyeyi bo bahisemo kutohereza abana ku mashuri ngo babanze bizere neza ko umutekano ari wose.

Kuwa mbere tariki ya 19 Nzeri nibwo i Kinshasa haramukiye imyigaragambyo, yari yateguwe n’abayobozi b’amashyaka atavuga rumwe n’ubutegetsi, bagamije kwibutsa Perezida Joseph Kabila ko hasigaye amezi atatu n’umunsi umwe ngo manda ye irangire.

Iyo myigaragambyo yari iteganyijwe kuba kuwa Mbere guhera saa saba z’amanywa, ariko iza kuburizwamo n’inzego z’umutekano, ari na cyo cyaje kuvamo imvururu hagati ya Leta n’urubyiruko rwigaragambyaga.

Abatavuga rumwe n’ubutegetsi batangaza ko iyi myigaragambyo yaguyemo abantu 50, mu gihe Umuryango urebera uburenganzira bwa muntu wo utangaza ko ari 44 n’aho Leta ya Congo ikavuga ko ari 17 barimo abapolisi 3.

Izo mvururu zatumye Kiliziya Gatulika yivana mu biganiro by’amahoro byatumijwe na Perezida Kabila, inama y’Abasaseridoti muri icyo gihugu ikaba ivuga ko hafashwe icyo cyemezo mu rwego rwo kubanza kunamira abahitanywe n’izo mvururu.

Izo mvururu kandi zatumye Umuryango wa Afurika Yunze Ubumwe, ari na wo muterankunga mukuru w’ibyo biganiro, uba ubihagaritse by’agateganyo kugeza kuwa Gatanu w’iki cyumweru.

Itegeko Nshinga riteganya ko amatora y’Umukuru w’Igihugu uzasimbura Perezida Joseph Kabila azakorwa kuwa 20 Ukuboza 2016, icyakora ubu bisa n’aho bidashoboka ko icyo gihe cyakubahirizwa.

Perezida w'u Bufaransa, François Hollande yatangaje ko Leta ya Congo yagize uruhare mu mvururu zahitanye benshi
Mu Mujyi wa Kinshasa umutekano watangiye kugaruka nyuma y'iminsi ibiri bari mu myigaragambyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza