Perezida Tshisekedi aritegura kuyobora AU

Yanditswe na Uwimana Abraham
Kuya 3 Gashyantare 2021 saa 08:28
Yasuwe :
0 0

Harabura iminsi mbarwa Perezida wa Repubulika Iharanira Demokarasi ya Congo, Félix Tshisekedi, akajya ku ntebe y’ubuyobozi bw’Umuryango wa Afurika Yunze Ubumwe (AU), asimbuye Perezida wa Afurika y’Epfo, Cyril Ramaphosa, muri uku kwezi kwa Gashyantare 2021.

Benshi babona ko ari amahirwe akomeye Tshisekedi ahawe azamufasha kuzamura izina rya Repubulika Iharanira Demokarasi ya Congo n’ubuyobozi bwe ku ruhando rwa Afurika.

Umunyapolitike wo muri Benin, Victor Topanou, yavuze ko abona ari amahirwe kuri Tshisekedi mu kurushaho kugarura ibintu ku murongo muri RDC, ndetse bizamufasha cyane mu guhosha amakimbirane y’imbere mu gihugu, akaba ngo atanga icyizere cy’uko inshingano azazuzuza neza.

Ati “Ibi bizamufasha gukomeza imigambi ye, ndetse bizatuma amakimbirane yari afitanye n’uwo yasimbuye Kabila abasha guhoshwa. Ese azarangiza izi nshingano neza? Yego ntekereza ko azazirangiza neza, cyane ko yabashije no guhosha ibibazo by’imbere mu gihugu, ntekereza rero ko afite ubushobozi bwo kuzabikora neza.”

N’ubwo bimeze bityo, haracyari ibibazo bimwe na bimwe by’imbere mu gihugu agikeneye guhangana nabyo.

Nko mu minsi ishize Minisitiri w’Intebe yareguye, mu gihe mu Ukuboza Umuyobozi w’Inteko Jeannine Mabunda nawe yegujwe kuri uwo mwanya nyuma y’inyandiko yandikiwe ashinjwa ubushobozi budahagije.

Ibyo byose kandi byiyongeraho kutumvikana kumaze iminsi hagati y’ihuriro rya CASH na FCC rya Kabila, yitegura gusimbuza ihuriro rye rishya, hakaba n’ibibazo by’imitwe yitwaje intwaro ikigaragara mu burasirazuba bw’icyo gihugu.

Félix Tshisekedi abaye umuperezida wa kabiri wa Repubulika Iharanira Demokarasi ya Congo uyoboye Umuryango wa Afurika Yunze Ubumwe, nyuma ya Mobutu wawuyoboye mu 1967.

Tshisekedi agiye kuba Umukuru w'Igihugu wa Kabiri ya RDC uyoboye uyu muryango

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .