Perezida Tshisekedi agiye kubaka agace gashya muri Kinshasa kazaba karimo inyubako zidasanzwe

Yanditswe na Ndahayo Emmanuel
Kuya 5 Gashyantare 2021 saa 07:23
Yasuwe :
0 0

Leta ya Repubulika Iharanira Demokarasi ya Congo igiye kubaka agace k’akataraboneka kitwa Kitoko, kazubakwamo inyubako z’ibiro bikomeye bya Leta birimo za minisiteri, Isoko ry’Imari n’Imigabane, ivuriro ndetse na kaminuza byose bitanga serivise zo ku rwego mpuzamahanga.

Aka gace kazaba kitwa ’Ministerial City of Kitoko’, kakazaba kubatswe kuri hegitare ibihumbi 20, aho kimwe cya kabiri cyazo kizagenerwa inyubako zo gukoreramo mu gihe ikindi gice kizaba kigenewe ibikorwa by’ibidukikije, birimo amashyamba.

Aka gace kazaba karimo inyubako umunani zizakoreramo minisiteri ndetse hakazubakwa n’Ibiro Bikuru bya Minisitiri w’Intebe wa Congo. Buri nyubako mu zizukorerwamo na minisiteri ikazaba igizwe n’amagorofa atatu.

Muri aka gace kandi hazubakwa inyubako yakirirwamo inama, ishobora kwakira abashyitsi 800. Iyi nyubako izaba ifite ishusho itangaje, imeze nk’inyubako za Pyramid zamenyekanye cyane mu gihugu cya Misiri ariko zicuritse.

Inyubako izakoreramo Inteko Ishinga Amategeko nayo izaba yihariye, kuko ifite ubushobozi bwo kwakira abantu 2 800, bituma iba imwe mu nyubako nini zikorerwamo n’Inteko Ishinga Amategeko ku rwego rw’Isi.

Ni agace kandi kazaba karimo ibitaro biri ku rwego rwo hejuru, bizaba bifite n’ahantu hashobora kwakirirwa abarwayi baturukijwe mu bindi bice by’igihugu bakazanwa mu ndege.

Hazanashyirwa kandi kaminuza y’ikoranabuhanga iri ku rwego rwo hejuru, ndetse hanashyirwe ibiro bya ’Banque de l’Habitant’, izagira uruhare runini mu guteza imbere umushinga w’imyaka itanu wa Perezida Tshisekedi wo kubaka inzu 250 000 yo guturamo, mu rwego rwo gukemura ibibazo by’imiturire mu mujyi wa Kinshasa.

Hazaba kandi hari n’inyubako izakoreramo Ibiro Bikuru bikoreramo Isoko ry’Imari n’Imigabane aho muri Congo. Hazubakwa kandi ’inyubako ebyiri ndende ziswe ’Gecamines Twin Towers’, inyubako zizaba ari ndende muri aka gace kose, zifite amagorofa 60.

Aka gace kandi kazubakwamo inyubako y’Urukiko rw’Ikirenga, inyubako izakoreramo itangazamakuru, inzu ndangamurage y’ibishushanyo by’amateka ndetse n’izindi nyubako zitandukanye.

Byitezwe ko uyu mushinga nurangira, uzagira uruhare runini mu guteza imbere imikorere ya Leta ya Congo na cyane ko inzego zizakorera hamwe, ariko by’umwihariko, aka gace kazanatanga isura nshya ku mahanga yo kwerekana Congo nk’igihugu kitasaritswe n’intambara gusa, ahubwo gifite amahirwe akomeye y’iterambere ndetse n’ishoramari.

Aka gace kazubakwa mu birometero 40 uvuye mu mujyi rwagati wa Kinshasa, ndetse no mu birometero 15 uvuye ku kibuga cy’indege cya N’Jili. Pierre Goudiaby Atepa, umushushanyi w’inzu uzwi cyane mu gihugu cya Senegal ni we wakoze igishushanyo mbonera cy’aka gace. Byitezwe ko kazatwara miliyari enye zo kubaka igice cya mbere cyako, kigomba kuba cyarangiye mu myaka itanu iri imbere.

Imiterere y’umushinga wa Kitoko ugiye kubakwa muri Repubulika Iharanira Demokarasi ya Congo

Iyi ni Banque d'Habitant izafasha Tshisekedi kuzubaka amazu 250 000 yo guturamo
Inyubako izaba ikoreramo Ibiro bya Minisitiri w'Intebe
Inyubako izaba ikoreramo Ibiro bya Minisitiri w'Intebe {JPEG}
Iyi Ingoro Ishinga Amategeko izaba ifite ubushobozi bwo kwakira abantu 2 800, ikazaba ari imwe mu za mbere ku Isi mu bunini
Ni agace kazubakwamo gari ya moshi igahuza n'ibindi bice bya Congo
Amazu azaturwamo muri aka gace azaba afite ibyangombwa byose
Aka gace kazaba kagezweho
Izi nyubako zizaba ari umunani, zikazakoreramo minisiteri zitandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .