00:00:00 IGIHE NETWORK KN KINYARWANDA EN ENGLISH FR FRANCAIS

Kera kabaye, Perezida Samia yemeye ko muri Tanzania hari abarwayi ba Covid-19

Yanditswe na Muhonzire Sylvine
Kuya 27 Kamena 2021 saa 08:08
Yasuwe :
0 0

Bwa mbere kuva muri Gicurasi 2020, Perezida wa Tanzania, Samia Suluhu, yavuze ko muri iki gihugu hari abarwayi ba Covid-19, ariko yirinda gutangaza umubare wabo ahubwo ahamagarira abayobozi b’amadini gukebura abayoboke babo ngo bakurikize amabwiriza yo kwirinda ikwirakwira ry’iki cyorezo.

Ibi yabivugiye mu Nama y’Abepisikopi ba Kiliziya Gatolika, yabereye mu Mujyi wa Dar Es Salaam, ahitwa Kurasini.

Mu ijambo rye, Perezida Samia yavuze ko kwirinda biruta kwivuza bityo, yemeza ko abaturage bagomba gukangurirwa gukurikiza amabwiriza yo kwirinda Coronavirus kugira ngo bagabanye impfu za Covid-19.

Yagize ati “Ndabizi kuva mu ntangiriro z’iki cyorezo abayobozi b’amadini bagize uruhare rukomeye mu kukirwanya. Twinjiye mu nkubiri ya gatatu y’iki cyorezo kandi ibimenyetso biragaragara hose mu gihugu, kuko dufite abarwayi bagaragaweho iki cyorezo.”

Perezida Samia nyuma yo gusimbura nyakwigendera John Pombe Magufuli wari warinangiye ku byerekeye amabwiriza yo kwirinda Covid-19, yazanye impinduka mu gihugu, abaturage batangira kwambara udupfukamunwa, hirya no hino hashyirwa aho gukarabira intoki.

Perezida Samia Suluhu yavuze ko mu rugamba rwo guhashya Covid-19 abantu badakwiye kugenda biguru ntege.

Ati “Ndagira ngo mbabwire ko iki kibazo [cya Covid-19] kigihari kandi ntabwo tugomba gucika intege. Ndabasaba mwebwe bayobozi b’amadini gukangurira byimazeyo abayoboke banyu kugira ngo twirinde impfu nyinshi mu gihugu. Tugomba gusaba Imana kudukiza iki cyorezo.”

Mu minsi 100 gusa amaze ku buyobozi bw’iki gihugu, Perezida Samia agenda ahindura imiyoborere ya Magufuli ku byerekeye uko icyorezo cya Covid-19 gifatwa muri Tanzania.

Kugeza ubu iki gihugu ntikiratangaza uko imibare y’abanduye ihagaze ndetse nta nubwo gishyira ku mugaragaro abahitanwe nayo.

Perezida Samia yashyize avuga ko muri Tanzania hari abarwayi ba Covid-19
Perezida wa Tanzania, Samia Suluhu, yahamagariye abayobozi b’amadini gukebura abayoboke babo ngo bakurikize amabwiriza yo kwirinda ikwirakwira ry’iki cyorezo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .