Perezida Ramaphosa yarahiye yizeza kurwanya ruswa no guhanga imirimo

Yanditswe na HABIMANA James
Kuya 25 Gicurasi 2019 saa 05:42
Yasuwe :
0 0

Perezida Cyril Ramaphosa yarahiriye kuyobora Afurika y’Epfo kuri uyu wa Gatandatu, avuga ko azongera imirimo mu gihugu ndetse akarwanya ruswa.

Ramaphosa abaye Perezida wa kane wa Afurika y’Epfo utowe n’abaturage nyuma yo guhagarika ubutegetsi bw’irondaruhuru (apartheid) mu 1994.

Irahira rye ryitabiriwe n’abantu barenga ibihumbi 32 mu murwa mukuru Pretoria barimo Perezida Paul Kagame w’u Rwanda, uwa Repubulika Iharanira Demokarasi ya Congo Felix Tshisekedi, Minisitiri w’Intebe wa mbere w’u Bushinwa Li Keqiang n’abandi.

Ramaphosa w’imyaka 66 yagize ati “Uyu munsi igihugu cyacu kinjiye mu bihe bishya by’icyizere no kongera kwiyubaka. Reka duharanarire gushyira hamwe mu iterambere n’andi mahirwe yose ahari, tugire igihugu kitarangwamo ruswa n’ibindi.”

Yakomeje agira ati “Ibibazo igihugu cyacu kirimo guhura nabyo ni byinshi kandi nibyo koko ariko ntibisobanuye ko bidashobora gukemuka, bishobora gukemuka kandi mpagaze hano ngo mvuge ngo bigiye gukemuka.”

Ku wa 22 Gicurasi nibwo Inteko Ishinga Amategeko ya Afurika y’Epfo yemeje Cyril Ramaphosa nka Perezida w’iki gihugu. Ni intebe yicaye kuva muri Gashyantare 2018 ubwo yagirwaga perezida ngo asoze manda ya Jacob Zuma yari abereye visi perezida, wari umaze kwegura ku gitutu cy’ishyaka rye ANC.

Matamela Cyril Ramaphosa w’imyaka 66 yatowe nyuma y’uko ku wa 8 Gicurasi 2019, ishyaka rya ANC abarizwamo ari naryo riyoboye Afurika y’Epfo ritsinze amatora y’abadepite ku bwiganze.

ANC yatsinze ku majwi 57.5%, biyiha gufata imyanya 230 muri 400 y’abagize Inteko Ishinga Amategeko. Iri shyaka ryakurikiwe n’irya Democratic Alliance ryagize amajwi 21 % naho irya Economic Freedom Fighters rya Julius Malema ribona amajwi 11%.

Itegeko Nshinga rya Afurika y’Epfo ryo mu 1963 rivuga ko Perezida atorwa n’abadepite mu ishyaka ryagize imyanya myinshi mu Nteko Ishinga Amategeko. Ramaphosa agiye kuyobora igihugu mu gihe ibibazo by’ubukungu bikomeje kwiyongera n’ubushomeri buri kuri 27%.

Daniel Silke umwe mu basesenguzi mu bya politike yabwiye ibiro ntaramakuru by’Abongereza, Reuters ko ubushobozi bwa Ramaphosa bwo kuzana impinduka mu gihugu buzagaragara mu cyumweru gitaha ubwo azaba ashyiraho abagize guverinoma nshya.

Perezida Cyril Ramaphosa arahirira kuyobora Afurika y'Epfo muri manda y'imyaka itanu
Perezida Ramaphosa (iburyo) ubwo yari arangije kurahira
Ni ibirori byitabiriwe n'abantu barenga ibihumbi 30
Ibitangazamakuru birimo Daily Mail byavuze ko gutegura umuhango w'irahira rya Ramaphosa byatwaye amadorali miliyoni umunani

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza