Perezida Nkurunziza yitiriye inyubako zirimo Perezidansi n’ikibuga cy’indege abakurambere n’abaharaniye ubwigenge

Yanditswe na Evariste Nsengimana
Kuya 1 Nyakanga 2019 saa 08:11
Yasuwe :
0 0

Perezida w’u Burundi, Pierre Nkurunziza yavuze ko mu guhora bibuka amateka y’igihugu no gusigasira ubusugire cyahoranye mbere y’abakoloni, hari amazina y’inyubako n’inzibutso bikomeye birimo Perezidansi, ikibuga cy’indege, ingoro z’Inteko Ishinga Amategeko bigomba guhabwa amazina y’abagize ubutwari muri iki gihugu.

Nkurunziza yabitangaje mu ijambo rijyanye n’ukwigenga k’u Burundi kugiye kwizihizwa ku nshuro ya 57.

Perezida Nkurunziza yavuze ko mbere y’ubukoroni, igihugu cyahoze gishingiye ku muco n’indangagaciro byihariye, bifite amateka ku bakurambere ariko biza kuvangirwa n’abakoloni.

Yavuze ko mu gihe igihugu cyizihiza iyo isabukuru, Intwari zacyo zaharaniye ukwigenga, kigasubirana ingoma abakoloni bari barigabije, hari inyubako zigomba guhabwa amazina afite ubusobanuro bujyanye n’amateka y’u Burundi kugira ngo atazibagirana.

Mu nyubako Nkurunziza yavuze ko zizahabwa amazima harimo ingoro y’Abadepite igiye kubakwa mu Ntara ya Gitega izitirirwa igikomangoma Louis Rwagasore, Intwari yaharaniye ubwigenge bw’icyo gihugu naho Inteko ya Sena ikazitirirwa Pierre Ngendandumwe wabaye Minisitiri w’Intebe wa mbere.

Perezida Nkurunziza yavuze ko ikibuga mpuzamahanga cy’indege cya Bujumbura cyitiriwe Melchior Ndadaye waharaniye Demokarasi y’Abarundi naho Stade Louis Rwagasore ikitwa Stade Intwari.

Nkurunziza yavuze ko inkambi ya gisirikare y’abakomando ya 211 izitirirwa Umwami Ntare Rugamba naho ingoro ya Perezida cyangwa Perezidansi, igiye gutahwa mu gihe cya vuba ikitirirwa Umwami wa mbere w’u Burundi, Ntare Rushatsi.

Ati “Mu Kirundi tuzandika kandi tuvuge kwa Ntare Rushatsi.”

Nkurunziza yavuze ko umuhanda witiriwe uwa 3 Kanama uhawe kwitirirwa Intwari Gen. Adolphe Nshimirimana, wahoze ayobora urwego rw’ iperereza n’umutekano bwite wa Nkurunziza, wishwe n’abagizi ba nabi mu nkundura yabaye mu 2015, yakurikiye kongera kwiyamamaza kwa Nkurunziza.

Asobanura igihe bizatangira kubahirizwa, Perezida Nkurunziza yagize ati “Tugiye gushyiraho itsinda ry’inzobere rizatunganya neza icyo gikorwa, mu bwenge n’ubwitonzi mu gihe cy’amezi atatu, maze amazina y’Intwari zidasanzwe z’u Burundi izahore mu mitima y’Abarundi, biciye mu kubitirira inyubako n’inzibutso biranga ubwiza bw’u Burundi.”

U Burundi kimwe n’ibindi bihugu bimwe byo muri Afurika y’u Burasirazuba byizihiza umunsi w’ubwigenge buri wa 1 Nyakanga, byabonye mu 1962.

Perezida Nkurunziza yitiriye zimwe mu nyubako abakurambere n'abagize uruhare mu bwigenge bw'u Burundi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza