Perezida Nkurunziza yateye utwatsi ibikubiye muri Raporo ya Loni kuri Jenoside

Yanditswe na Jean Pierre Tuyisenge
Kuya 26 Nzeri 2016 saa 02:42
Yasuwe : XX
0

Perezida w’u Burundi, Pierre Nkurunziza yamaganye ibikubiye muri Raporo Umuryango w’Abibumbye uheruka gushyira hanze, bivuga ko mu Burundi hari ihungabana rikomeye ry’Uburenganzira bwa muntu kandi ko hashobora kwaduka Jenoside.

Kuva iyo Raporo yasohoka ku wa 20 Nzeri 2016, muri iki gihugu hatangiye gukorwa imyigaragambyo iyamagana ndetse ibonekamo abaturage n’ abategetsi bakomeye.

Jeune frique yanditse iyi nkuru ivuga ko tariki ya 24 Nzeri, mu mihanda ya Bujumbura,hagaragaye abantu benshi bafite ibyapa byanditse amagambo avuga ko u Burundi ari igihugu kimwe, gifite ururimi rumwe ndetse ko kitazigera kibamo Jenoside.

Perezida Nkurunziza na we yanditse ku rukuta rwe rwa Twitter yamagna ibikubiye muri iyo raporo ati “Twasobanuriye Loni ko mu buryo bwose, bwaba ubwa Politiki, ubw’amategeko, imibereho y’abaturage ko nta Jenoside itazigera iba mu Burundi. Ikibabaje ni uko bagarukanye bya byapa byabo ngo Jenoside mu Burundi”.

Perezida Nkurunziza yongeyeho ko ukuri kuzatsinda, ati “ Bizarangira ukuri gutsinze kandi kugaragarire isi yose nkuko abarundi bavuga ngo ‘Ukuri guca mu ziko ntigushye.”

Raporo ya Loni yafashwe nk’ishingiye ku binyoma

Thérence Ntahiraja, Umuyobozi muri Minisitri y’Ubutegetsi bw’igihugu yabwiye imbaga y’abigaragambyaga ibisa n’ibya Perezida Nkurunziza.

Yagize ati “ Ziriya raporo zabo zuzuyemo ibinyoma gusa bishingiye ku mabwire y’abatavuga rumwe n’ubutegetsi bwacu. Ni ibinyoma gusa, turasaba umuryango w’Abibumbye kudaha agaciro ibiyikubiyemo”

Iyo raporo igaruka cyane ku byaha byibasiye inyokomuntu byakozwe hagati y’itariki 15 Mata 2015 na 30 Kamena 2016,ikavuga ko hari ibimenyetso bikomeye bya Jenoside.

Kuri uyu wa mbere, i Genève mu Busuwisi hateraniye inama ya 33 yiga ku iyubahirizwa ry’uburenganzira bw’ikiremwamuntu, ibibazo by’u Burundi nibyo byihariye umwanya munini hagati y’abahanga ba Loni, impirimbanyi z’Uburenganzira bw’ikiremwamuntu n’intumwa za Guverinoma y’u Burundi nk’uko iyi nkuru ikomeza ibitangaza.

Kuva Perezida Nkurunziza yatangaza ko aziyamamariza kuyobora u Burundi kuri manda ye ya gatatu we yitaga iya kabiri akaza no kuyitorerwa, muri icyo gihugu hatangiye ibikorwa by’ubugizi bwa nabi byatumye Abarundi batari bake bahunga, abandi baricwa nkuko Loni yakomeje kubitangaza.

Perezida Nkurunziza yahakanye ibikubiye muri Raporo ya ONU
Abarundi bagiye mu mihanda bamagana Raporo ya ONU

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza